Россия үрдүнэн алтынньы 10 күнүгэр тыа хаһаайыстыбатын үлэһиттэрин күнэ бэлиэтэнэр

Бүгүн, алтынньы 10 күнүгэр, тыа хаһаайыстыбатын уонна соҕотуопка үлэһиттэрэ, бэтэрээннэрэ идэтийбит бырааһынньыктарын бэлиэтииллэр. Бу туһунан СӨ бырабыыталыстыбатын уонна баһылыгын дьаһалтатын пресс сулууспата иһитиннэрэр.

Саха сирин тыа хаһаайыстыбатын үлэһиттэрин өрөспүүбүлүкэ премьерэ Андрей Тарасенко эҕэрдэлээтэ.

«Саха сирэ бэйэтэ — тыа хаһаайыстыбатын өрөспүүбүлүкэтэ. Улуустарга тыа хаһаайыстыбатынан дьарыктанар туруу үлэһиттэр бааллар. Ол эрэн быйыл от уонна бурдук тиийбэт балаһыанньата үөскээбитигэр, мобильнай биригээдэлэри күүһүрдэн, тиийбэт сүөһү аһылыгын ыаллыы сытар оройуоннартан ыларга үлэ ыыттыбыт. Барыта хаһаайыстыбаларбытын хааччыйар уонна сүөһү ахсаанын аҕыйаппат туһугар», — диэтэ кини.

Үүннэрии, оҥорон таһаарыы уонна туһаныы барыта бэйэбит өрөспүүбүлүкэбит иһинэн буолуохтаах.

«Ол туһугар тыа хаһаайыстыбатыгар техническэй уонна технологическай саҥардыы буолуоҕа. Бу нэдиэлэҕэ Москва куоракка «Агропродмаш-2021» норуоттар икки ардыларынааҕы быыстапкаҕа аныгы оборудованиены ылыыга кэпсэтии ыыттыбыт», — диэн премьер кэпсээтэ.

Росагролизинг хампаанньаны кытта тыа хаһаайыстыбатын тиэхиньикэтин сайыннарыыга сөбүлэҥҥэ илии баттастылар.

«Ил Дархан Айсен Николаев өрөспүүбүлүкэҕэ тыа хаһаайыстыбатын сайыннарыыга чопчу сыал туруорда. Тыа хаһаайыстыбатын өйүүр саҥа хамсааһыны оҥоруохтаахпыт, олохтоох оҥорон таһаарыы аһынан-үөлүнэн Саха сирин дьонун-сэргэтин хааччыйыахтаахпыт», — диэн бырабыыталыстыба бэрэссэдээтэлэ чопчулаата.

Онон, тыа хаһаайыстыбатыгар оҥорон таһаарыы тиһигин өйөбүлүгэр уонна тыа хаһаайыстыбатын үлэһиттэрин дохуоттарын үрдэтиигэ, олохтоох оҥорон таһаарыы бородуксуйата тупсуутугар уонна тыа хаһаайыстыбатын уопсай сайдыытыгар үлэ салгыы ыытыллыаҕа.