Саха АССР 100 сылын көрсө тэрээһиннэр ыытыллыахтара

Өрөспүүбүлүкэ үбүлүөйүн көрсө саҥа сыл бастакы кыбаарталыгар быраааһынньыктааҕы тэрээһиннэр ыытыллыахтара. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.

Ил Дархан Айсен Николаев тохсунньу 10 күнүгэр өрөспүүбүлүкэ бырабыыталыстыбатын кытта мунньахтаата, уһун болдьохтоох сүрүн соруктары чопчулаата.

«Тохсунньуга СӨ тэриллибитэ 100 сыллаах үбүлүөйүгэр былааннаммыт өрөспүүбүлүкэтээҕи уонна федеральнай таһымнаах тэрээһиннэри олоххо киллэрэн саҕалыыбыт», — диэтэ кини.

Ону тэҥэ, Айсен Николаев судаарыстыбаннай бырагыраамалар тохтоото. Ол курдук, тыа хаһаайыстыбатын сайдыытын федеральнай бырагырааматыгар уларыйыы киирдэ.

«Быйылгыттан кэтэх хаһаайыстыбалаах уонна бэйэ дьарыктаах дьон судаарыстыбаттан субсидия ылыахтарын сөп», — диэтэ кини.

Маны таһынан, регионнар билигин креативнай индустрия оскуолаларын тэрийиигэ федеральнай бүддьүөттэн субсидия ылыахтарын сөп. Манна 5-11 кылаас үөрэнээччилэрэ тыас-уус режиссуратыгар, анимацияҕа, видеону оҥорууга, электроннай музыканы айыыга, 3D- графикаҕа, дизайҥа, интерактивнай цифровой технологияларга эбии үөрэҕи ылыахтарын сөп. Ханнык регионнарга маннык оскуола тэриллэрин Россия култууратын министиэристибэтэ куонкурус түмүгүнэн быһаарыаҕа.

Дойду бырабыыталыстыбата Арктика эҥэригэр олорор оҕолорго Россия сынньанар сирдэригэр босхо путевка көрүллэрин туһунан уурааҕы бигэргэппитин Ил Дархан бэлиэтээтэ, босхо путевканан 5-8-с кылаас үөрэнээччилэрэ туһаныахтара.