Саха буойуннарын кэриэһигэр Ильмень күөлү тула сүүрүү Новгородскай уобаласка саҕаланна

Новгородскай уобаласка Кыайыы күнүгэр уонна саха буойуннарын сырдык кэриэһигэр анаммыт Ильмень күөлү тула сүүрүү саҕаланна. Бу туһунан Россия бэрэсидьиэнин иһинэн үлэлиир Постпредство пресс-сулууспата иһитиннэрэр.

Спортсменнар, Дьокуускай куорат Умуллубат уотуттан саҕыллыбыт факелы тутан, Ильмень күөлү тула 264 килэмиэтири сүүрүөхтэрэ.

«Биһиги сүүрүүнү Кыайыы 76 сылыгар уонна Саха сиригэр Комсомол 100 сылыгар анаан тэрийдибит. Быйыл новгородскай уонна старорусскай спортсменнара кыттыыны ылаллар», — диэтэ СӨ спордун уонна физическай култууратын үтүөлээх үлэһитэ, сүүрүүнү көҕүлээччи Дмитрий Горохов.

Бастакы түһүмэх Улуу Новгородка түмүктэннэ. Спортсменнар Аҕа дойду Улуу сэриитин кыттыылаахтарын иһийэн кэриэстээтилэр уонна Умуллубат уокка сибэккилэри уурдулар.

Сүүрүү ыам ыйын 7 күнүгэр Устрека дэриэбинэтигэр баар саха буойуннарын пааматынньыгар түмүктэниэҕэ. Түмүктүүр түһүмэххэ, Старорусскай оройуонтан 40 үөрэнээччи, Петербург олохтоохторо уонна сахалар делегациялара кыттыыны ылыахтара.