Саха сирэ ипотекаҕа саамай кыра бырыһыаннаах биэс регион ахсааныгар киирдэ

Ипотека кирэдьиитин намыһах бырыһыанынан өрөспүүбүлүкэ Россия биэс бастыҥ куораттарын ахсааныгар киирдэ. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.

Киин баан исписэлиистэрэ 2021 сыл тохсунньутуттан атырдьах ыйыгар диэри бырыһыан орто кээмэйин таһымын үөрэттилэр.

«Ипотека саамай намыһах бырыһыана Приморскай кыраайга (6,19%), Магаданскай уобаласка (6,32%), Сахалинскай уобаласка (6,33%), Чукоткаҕа (6,34%), Саха сиригэр (6,39%) бэлиэтэннэ», — диэн иһитиннэриигэ этиллэр.

Бу 35-гэр диэри саастаах эдэр ыалларга көрүллэр, 2%-наах «Уһук Илиҥҥи ипотека» сабыдыала буолар.

Вице-премьер — Уһук Илиҥҥи региоҥҥа боломуочуйалаах бэрэстэбиитэл Юрий Трутнев эппитинэн, 2021 сылга бу бырагырааманан сааһыттан тутулуга суох быраастар уонна учууталлар туһанар буолуохтара.

Саамай үрдүк бырыһыаннаах ипотека Ингушетияҕа (8,14%), Чечняҕа (8,04%), Севастопольга (7,82%), Тываҕа (7,79%), Иркутскай уобаласка (7,62%) бэлиэтэннэ.