Саха сирэ «Сколково» өйдөөх протезтары оҥорор резиденин кытта бииргэ үлэлэһиэҕэ

Өрөспүүбүлүкэ «Сколково» резиденин кытта — «Моторика» хааччахтаммыт эппиэтинэстээх тэрилтэлиин — киһи үөһээ лабааларын үрдүк технологиялаах протезтарынан хааччыйыыга бииргэ үлэлэһиэҕэ. Бу туһунан СӨ баһылыгын уонна бырабыыталыстыбатын пресс-сулууспата иһитиннэрэр.

Саха сирэ «Доруобуйа харыстабылын саҥа хаачыстыбата» бырайыагы олоххо киллэрэр хампаанньаны кытта үһүс сылын бииргэ үлэлиир.

Бырайыак сыала- соруга — доруобуйаларыгар хааччахтаах дьон үрдүк технологиялаах, аныгы техническэй сириэстибэлэр көмөлөрүнэн чөллөрүгэр түһэллэригэр кыах биэрии, итиэннэ туһанааччылар олохторун хаачыстыбатын үрдэтии.

 Муус устар 14 күнүгэр өрөспүүбүлүкэ бэрэссэдээтэлин солбуйааччы Ольга Балабкина «Моторика» ХЭТ региональнай сайдыытын дириэктэрэ Руслан Садыков кыттыылаах бу боппуруоһу олоххо киллэрии боппуруостарын туһунан сүбэ мунньах ыытта.

Вице-премьер  «Моторика» протезтарын үрдүк хаачыстыбатын сыаналаата уонна салгыы бииргэ үлэлэһэр туһунан биллэрдэ.

Руслан Садыков Саха сирин протез оҥорор тэрилтэлэрин компетенцията үрдээбитин, үлэһиттэр квалификацияларын тиһигин быспакка үрдэтэллэрин уонна саҥа технологиялары баһылыылларын тоһоҕолоон бэлиэтээтэ.

«Биһиги Дьокуускай куоратынан эрэ  муҥурданыа суохтаахпыт. Протезтарынан ыраах оройуоннар эмиэ туһаныахтаахтар», — диэтэ Ольга Балабкина.

Кини өрөспүүбүлүкэ тустаах министиэристибэлэригэр протезка наадыйар дьон ахсаанын быһаарарга соруйда, хааччыйыы географиятын кэҥэтии боппуруоһун үөрэтэргэ сорудахтаата.

Санатан эттэххэ,  «Якутия 24» ханаал, өрөспүүбүлүкэ 18 олохтооҕо босхо протез ылыахтааҕын туһунан иһитиннэрбитэ.