Саха Өрөспүүбүлүкэтэ уонна ВЭБ.РФ куорат эйгэтин сайыннарыыга аналлаах бырайыактары олоххо киллэриигэ 24 мөлүйүөн солкуобайтан тахса суумалаах бииргэ үлэлэһии сөбүлэҥин түһэристилэр.
Өрүттэр Дьокуускайга киэҥ хабааннаах инвестиционнай бырайыактары бэлэмнээһиҥҥэ уонна олоххо киллэриигэ сөбүлэстилэр, манна тырааныспар логистическай киинин тутуута, уопсастыбаннай тырааныспары саҥардыы бырагырааматын оҥоруу, аэропорт норуоттар икки ардыларынааҕы терминалын сөргүтүү, 4-с категориялаах, 150 нүөмэрдээх, COSMOS диэн национальнай бреннээх гостиницаны уонна регион киинин култуура уонна сынньалаҥ пааркатын саҥардыы чэрчитинэн спортивнай-чэбдигирдэр комплексы тутуу киирэр. Ону тэҥэ Жатайдааҕы суудунаны оҥорор собуот тутуу бастакы түһүмэҕин туһунан кэпсэттилэр.
«Бүгүн баттаммыт сөбүлэҥ куоракка аныгы, тупсаҕай усулуобуйаны тэрийэргэ ананар. Куораттааҕы экономиканы сайыннарыыга бары бырайыактар ВЭФ.РФ хампаанньаҕа сүдү суолталаах буолаллар. Биһиги бырайыактарбыт дьон олоҕун хаачыстыбатын үрдэтиэҕэ диэн эрэнэбит. Биһиги билигин корпорация өттүттэн өйөбүлү көрөбүт. Улахан, уустук уонна ураты инфраструктурнай бырайыактары олоххо киллэрэргэ финансовай бородууктаны, инвесторскай быһаарыыны сөпкө ааҕар дьоҕурдаахтар», – диэн СӨ Бырабыыталыстыбатын бэрэссэдээтэлин бастакы солбуйааччы Кирилл Бычков бэлиэтээтэ.
Бычков бэлиэтээбитинэн, ВЭБ.РФ корпорация Саха сирин инфраструктурата сайдарыгар болҕототун уурара биһигини кытары ситимниир.
«Концессионнай сөбүлэҥнэргэ, судаарыстыбаннай-чааһынай бииргэ үлэлэһиигэ биһиги улахан өйөбүлү көрөбүт. Бу өттүгэр биһиги ВЭБ.РФ корпорацияны кытары күүскэ үлэлиибит, кинилэр өрөспүүбүлүкэни үчүгэйдик билэллэр. Улахан, уустук уонна ураты инфраструктурнай бырайыактары олоххо киллэрэргэ финансовай бородууктаны, инвесторскай быһаарыыны сөпкө ааҕар дьоҕурдаахтар», — диэн кини бэлиэтээтэ.
Экспертиза ыытыллыбытын кэнниттэн ВЭБ.РФ корпорация бырайыактары үбүлүөн сөп.
