Саха сиригэр булиҥҥа түбэспит оҕолору кытта үлэ күүһүрүө

Саха сирин оскуолалара атаҕастаныыга, буллиҥҥа, кибербуллиҥҥа түбэспит оҕолору быһаарыыны уонна биирдиилээн арыаллааһыны ыытыахтара. Бу туһунан СӨ үөрэххэ министиэристибэтин ыам ыйын 12 күнүнээҕи терроризмы утары үлэлэри күүһүрдүү туһунан бирикээһигэр этиллэр.

Докумуоҥҥа олоҕуран, оскуолалар уонна үөрэҕирии управлениелара терроризмы уонна экстремизмы сэрэтии миэрэлэрин былаанын бэлэмниэхтээхтэр. Ону тэҥэ тревожнай кнопкалар, видео кэтэбил камералара уонна күрүөлэр баалларын бэрэбиэркэлиэхтэрэ. Үөрэх тэрилтэлэрин салайааччылара учууталларга ыксаллаах быһыыга-майгыга дьаһаныы туһунан лекциялары, кылаас чаастарын, төрөппүттэр мунньахтарын тэрийиэхтээхтэр.

Министиэристибэ атаҕастаныы, буллинг, кибербуллинг төрүөтүнэн оскуолаҕа учуокка турар оҕолору кытта биирдиилээн үлэ былаанын бэлэмнииргэ соруйда. Ону таһынан улуустар уонна куораттар дьаһалталара тиһэх чуораан уонна оскуоланы түмүктүүр биэчэрдэр кэмнэригэр арыгы атыытын бобуу туһунан боппуруоһу көрүөхтэрэ.

Тустаах миэрэлэри күүһүрдүү ыам ыйын 11 күнүгэр Казань куоракка буолбут алдьархай кэнниттэн ыытыллара бэлиэтэнэр.

Ыччат ортотугар буллинг тоҕо тахсарын уонна оҕону онтон хайдах көмүскүөххэ сөбүн туһунан «Чохоон» оҕо YouTube ханаалын «Билбэккин ыйыт» таһаарыытыгар психолог Лариса Слепцованы кытта кэпсэтиигэ көрүҥ.