Саха сиригэр эбии 49 киһи коронавирустаабыт

Саха сиригэр ааспыт сууккаҕа 49 киһи коронавирустаабыта бигэргэннэ. Бу туһунан СӨ доруобуйа харыстабылын миниистирин бастакы солбуйааччыта Алексей Яковлев эпидемиологическэй балаһыанньа туһунан брифинг кэмигэр иһитиннэрдэ.

«Бүтэһик түөрт күҥҥэ өрөспүүбүлүкэҕэ коронавируһунан ыалдьыы көрдөрүүтэ үрдээһинэ бэлиэтэнэр. Суукка иһигэр 49 түбэлтэ бэлиэтэннэ, ону тэҥэ биир киһи тыына быһынна», — диэн эттэ.

Ол курдук, Дьокуускайга 33 киһи коронавирустаабыт, Алдан оройуонугар — үс, Аллайыахаҕа уонна Мэҥэ Хаҥаласка — иккилии, Үөһээ Бүлүүгэ, Ленскэйгэ, Миирнэйгэ, Нерюнгригэ, Ньурбаҕа, Өймөкөөҥҥө, Тааттаҕа, Уус Алдаҥҥа уонна Чурапчыга биирдии киһи ыалдьыбыт.

«Бүгүҥҥү күҥҥэ 647 киһи эмтэниини ааһар, ол иһигэр 72 оҕо. Ыалдьыбыт дьонтон үгүһэ 18-25 саастааҕа уонна 60-тан аҕа саастааҕа бэлиэтэнэр», — диэн миниистири солбуйааччы чопчулаата.

Онуоха атыы-эргиэн салаатын үлэһиттэрэ ыалдьыыларын түгэнэ элбээбит.

«Ол төрүөтүнэн, биһиги санаабытыгар, хааччахтыыр дьаһаллары тутуһуу мөлтөөһүнэ буолар», —диэн эттэ.