Саха сиригэр IT хайысхатынан дьарыктанар оҕо ахсаана элбээтэ

Бүтэһик үс сылга өрөспүүбүлүкэҕэ эбии үөрэхтээһиҥҥэ IT хайысхатынан дьарыктанар оҕо ахсаана 30%-нан элбээтэ. Бу туһунан Саха сирин баһылыгын уонна бырабыыталыстыбатын пресс-сулууспата иһитиннэрэр.

Бырагыраамалааһын, VR, инженернэй графика, 3D-прототипированиеҕа саҥа бырагыраамалар көмөлөрүнэн үрдээһин тахсыбыта бэлиэтэнэр.

«Аан дойду бүгүн тэтимнээхтик уларыйар. Билигин саҥа көлүөнэ олохтонон эрэр, кинилэр олохторун үрдүкү технологияны кытары ситимнииллэр. Устудьуоннарга уонна оскуола оҕолороругар олохтоммут сыһыаны кинилэргэ туттар сатаммат. Ол иһин биһиги Сахабыт дьоно сайдарыгар үөрэх инники күөҥҥэ сылдьыахтаах»,  – диэн Ил Дархан бэйэтин анал туһаайыытыгар бэлиэтээбитэ.

Региоҥҥа «Үөрэхтээһин» национальнай бырайыагынан «Хас биирдии оҕо ситиһиитэ» федеральнай бырайыак чэрчитинэн «Ай» оҕо технопааркалара сайдан иһэллэр. Билигин 15 оҕо технопааркатыгар 6 358 үөрэнээччини IT хайысхаҕа үөрэтэллэр. Бу кииннэргэ графическай дизайны, робототехника, бырагыраамалааһын бырайыактарын оҥорорго күүстээх көмпүүтэрдэр уонна аныгы оборудованиелар бааллар. 2024 сылга диэри өрөспүүбүлүкэ хас биирдии оройуонугар оҕо технопаарката баар буолуоҕа.

«Үөрэх» национальнай бырайыак «Цифровой үөрэх эйгэтэ» бырагыраама чэрчтитинэн Ньурба улууһугар «IT-Куб» цифровой киин аһыллыбыта. Ааспыт үөрэх сылыгар цифровой киин учууталларын хамаандата Москватааҕы хакатон 15 бастыҥ хамаандатын иһигэр киирбитэ, II Өрөспүүбүлүкэтээҕи хакатон кыайыылааҕа уонна «Hack the Ice» Уһук Илиҥҥи хакатон финалиһа буолла.

«Мин идэм – IT» өрөспүүбүлүкэтээҕи куонкурус дойду иһигэр соҕотох, кыттыылаахтарын ахсаана, географията сыллата улаатан, кэҥээн иһэр. Ол курдук, 2016 сылга куонкуруска 204 сайаапка киирбит буоллаҕына, 2021 сылга 1527 үөрэнээччи кытынна. Куонкурус кыайыылаахтара, кыттыылаахтара Mytona-ҕа, InDriver-га үлэлииллэр, сорох киин вузтарга тиэхиньикэ хайысхатыгар үөрэнэллэр.

Учууталлары бэлэмнээһиҥҥэ сүрүн болҕомто ууруллар. Илларионов IT-оскуолата 21 учууталы таһаарда, ону тэҥэ оскуола «Юные якутяне» ресурснай киини кытта тэҥҥэ учууталларга үрдэтии куурустарын ыытар.

Өрөспүүбүлүкэҕэ биэс эбии үөрэхтээһин тэрилтэтэ, 36 Наука аччыгый Академиятын регионнааҕы филиала, 28 муниципальнай киин, 13 оҕо технопаарката үлэлииллэр.