Саха сиригэр офиска үлэлиир дьон коронавируһунан ыалдьыылара элбээтэ

Өрөспүүбүлүкэҕэ офиска үлэлиир дьон коронавируһунан ыалдьыыларын көрдөрүүтэ үрдээтэ. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.

Иһитиннэриини Саха сирин сүрүн санитарнай бырааһа Маргарита Игнатьева өрөспүүбүлүкэтээҕи суһал штаб мунньаҕар билиһиннэрдэ.

Эпидемиологическай балаһыанньа мөлтөөбүтүнэн сибээстээн, үлэ биэрээччилэргэ үлэһиттэри дистанционнай көрүҥ үлэҕэ көһөрөргө сүбэлээтэ.

Маны таһынан, сынньатар уонна аралдьытар хайысхалаах маассабай тэрээһиннэри ыытыыга эбии хааччахтыыр дьаһаллар тахсыахтарын сөп, ол иһигэр оҕолорго эмиэ.