Саха сиригэр сааскы булт кэмэ саҕаланна

Саха сиригэр уу көтөрүгэр сааскы булт кэмэ саҕаланна.

Ил Дархан Айсен Николаев коронавируһунан сибээстээн булчуттары Роспотребнадзор бары ирдэбиллэрин тутуһа сылдьарга ыҥырда.

«Быйыл хааччахтыыр дьаһаллар булду таарыйбатылар. Онон булчуттар коронавирус инфекцията күүскэ тарҕаныытын сэрэтэр бары миэрэлэри тутуһа сылдьыахтара диэн эрэнэбин», — диэн бэйэтин Instagram аккаунугар суруйда.

Саха сирин быыһыыр сулууспата өрүс суоллара бары сабыллыбыттарын уонна мууска тахсыы сокуонунан бобулларын санатар. Ону тэҥэ, сааскы халаанынан сибээстээн, уу таһыма эмискэ үрдүөн сөбүн туһунан сэрэтэр.