Саха сиригэр уонна Челябинскай уобаласка кыра кыамталаах атомнай электростанцияны тутуохтара

Саха сиригэр уонна Челябинскай уобаласка кыра кыамталаах атомнай электростанциялары тутуохтарын сөп. Бу туһунан ТАСС-ка «Росатом» судаарыстыбаннай корпорацияттан «Страна Росатом» иһитиннэрдэ.

«Кыра кыамталаах атомнай электростанция туһунан этэр буоллахха, быйыл балай даҕаны хамсааһын барда. Маныаха Саха сиригэр уонна Челябинскай уобаласка тутуохха сөп диэн быһаардыбыт», — диэн «Росатом» баһылыга Алексей Лихачев эттэ.

Бу иннинэ корпорация Саха сирин кытта кыра кыамталаах электростанциялары тутарга тэҥҥэ үлэлэһэр туһунан сөбүлэҥ түһэрсибиттэрэ. Ил Дархан Айсен Николаев Илиҥҥи экономическай пуорумҥа (ВЭФ-2019) 2020 сылга 50 эбэтэр 75 МВт күүстээх атомнай электростанция ханна тутуллара бүтэһиктээхтик быһаарыллыа диэн иһитиннэрбитэ.

Лихачев этэринэн, кыра уонна орто кыамталаах электростанция тутуута атомнай энергетикаҕа биир сүрүн инникилээх хайысха буолар.