Саха сирин бүддьүөтэ туруктаах буолуутугар 1,3 млрд солкуобайы көрүөхтэрэ

Россия бэрэсидьиэнэ Владимир Путин соруйуутунан өрөспүүбүлүкэ федеральнай бүддьүөттэн эбии 1,298 миллиард солкуобайы бүддьүөт туруктаах буолуутун өйөбүлүгэр ылыаҕа.

Дойду бырабыыталыстыбатын бэрэссэдээтэлэ Михаил Мишустин 45 регион иһигэр 29,3 миллиард солкуобайы тыырыы туһунан дьаһалга илии баттаата.

Үбү бүддьүөт эйгэтин үлэһиттэрин хамнастара эбиллиитигэр, бастакы уочараттаах уонна социальнай суолталаах тэрээһиннэри олоххо киллэрэргэ, суол өрөмүөнүгэр, спортивнай уонна да атын сүрүн эбийиэктэри тутууга көрүөхтэрэ.

«Быйыл дотация эбиллиитин учуоттаан туран, регионнар бүддьүөттэрэ туруктаах буолуутугар уопсайа биир триллион солкуобайы көрдүлэр», — диэн Михаил Мишустин ахсынньы 6 күнүнээҕи мунньахха бэлиэтээтэ.

Кини этэринэн, 2021 сылга олоҕурбут суума аччыа суоҕа, индексацияланыаҕа.