Саха сирин социальнай бырайыактарыгар 23 мөл солк көрүлүннэ

Быйылгы Бэрэсидьиэн пуондатын граннарын Саха сириттэн сүүрбэ социальнай бырайыак кыайда. Уопсайа 22 мөлүйүөн 864 тыһыынча солкуобай көрүлүннэ. Сайаапкалары сүүрбэ икки оройуонтан ыыппыттар, ол иһигэр алта арктическай оройуонтан: Абыйтан, Аллайыахаттан, Анаабыртан, Булуҥтан, Аллараа Халыматтан уонна Өлөөнтөн. Сайаапка ахсаанынан Саха сирэ Уһук Илиҥҥэ бастыҥ көрдөрүүлээх. Социальнай коммуникация министиэристибэтэ иһитиннэрэринэн, куонкуруһу ааспатах бырайыактар Ил Дархан гранын куонкуруһугар олунньуга кыттыахтарын сөп. Региональнай бырайыактар куонкурустарыгар 97 мөлүйүөн солкуобай кэриҥэ көрүллүөҕэ.