Саха ювелир дьиэ кэргэнэ премьер-миниистир Мишустины кытта көрүстэ

Дойду бырабыыталыстыбатын бэрэссэдээтэлэ Михаил Мишустин «Ситиһиилээх дьиэ кэргэн – Ситиһиилээх Россия» форум чэрчитинэн урбаанньыттары кытта көрүстэ. Көрсүһүүгэ Саха сириттэн ювелирдар Станислав уонна Любовь Заболоцкайдар кытыннылар.

Кинилэр Мишустиҥҥа «Оhуор утум» ювелирнай хампаанньаларын оҥоһуктарын билиһиннэрдилэр. 1996 сыллаахха үс ини-бии балтыларын кытта саха култууратын кэрэһилиир сувенирдары, скульптуралары, киэргэли оҥорор хампаанньа тэриммиттэр. 25 сыл устата үлэлээбит мастарыскыай билигин көмүстэн уонна үрүҥ көмүстэн биэс тыһыынчаттан тахса араас моһуоннаах киэргэли оҥорор.

Дьиэ кэргэн урбаанын бүтүн россиятааҕы форума сыл аайы ыытыллар. Манна дойду бары регионнарыттан ситиһиилээх бизнестээх дьиэ кэргэн кыттар.