Сарсыҥҥыттан киин куоракка биллиилээх тренер Дмитрий Коркин төрөөбүтэ 95 сааһыгар анаммыт көҥүл тустууга норуоттар икки ардыларынааҕы турнир саҕаланыаҕа.
Бу бөдөҥ күрэхтэһиигэ кыттаары 14 дойдуттан уонна Россия 12 регионуттан барыта 160 тахса бөҕөс кэллэ.
Быйылгы үбүлүөйдээх турнир бирииһэ да ботуччу булуоҕа. Кыайыылаахтар 300, иккис буолбут бөҕөстөр 200-һү, оттон үһүс бочуоттаах миэстэни ылбыттар 100 тыһыынча солкуобайы тутуохтара.
Сарсын, балаҕан ыйын 7 күнүгэр, бөҕөстөр 10 ыйааһыҥҥа барытыгар тустуохтара, оттон өйүүн кыайыылаахтары быһаарыахтара.
Күрэхтэһии киириитэ босхо буолуо, онон куорат олохтоохторун уонна ыалдьыттарын кэлэн хапсыһыылары, кылбар кыайыылары көрөргүтүгэр ыҥыраллар.
Хаартыска: ЯСИА
