«Саюри» теплицэтэ куорат дьоно оҕуруот аһыгар наадыйыытын 30%-нын хааччыйыаҕа

Төгүрүк сыл устата үлэлиир «Саюри» теплицэтин комплекса 2022 сылтан киин куорат дьоно-сэргэтэ оҕуруот аһыгар наадыйыытын 30%-нын хааччыйыаҕа.

Бу туһунан «Кангалассы» индустриальнай паарка диэриэктэрин солбуйааччыта Николай Потапов ProДФО онлайн-форумҥа «Экономические точки роста регионов ДФО в условиях пандемии – системные выводы и вызовы» түмүк дьүүллэһиигэ иһитиннэрдэ.

«Оннооҕор 50 кыраадыс тымныыга сибиэһэй оҕурсунан аһатар «Саюри» комплексыгар эбии тутуу үлэҕэ киирдэҕинэ, Дьокуускай нэһилиэнньэтин оҕуруот аһыгар наадыйыытын 30%-нын хааччыйыаҕа. Билигин ТОР «Якутия» резиденнэрин бородууксуйата хас биирдии куорат олохтооҕун остуолугар баар, оннооҕор, хаҕын эмиэ Сахабыт сиригэр оҥороллор», — диэн кини бэлиэтээтэ.

Николай Потапов этэринэн, маны таһынан, өрөспүүбүлүкэ таһыгар бородууксуйаларын эргиэҥҥэ таһаарар тэрилтэлэр бааллар — ититэр хочуоллары Монголияҕа, алмаас уонна да атын күндү таастары кырыылааһын өҥөтө, Кытайга, атын да дойдуларга биллэр мамонт муоһуттан ураты оҥоһуктары оҥороллор.