Сииттэ сэлиэнньэтин баһаартан көмүскүүргэ утары уоту ыытыахтара

Сииттэ сэлиэнньэтин ойуур баһаардарыттан көмүскүүргэ утары уоту ыытыахтара. Бу туһунан Кэбээйи улууһун баһылыга Иван Левин иһитиннэрдэ.

Кини нэһилиэнньэлээх пуун олохтоохторун эвакуациялааһын туһунан быһаарыы өссө да ылылла илигин тоһоҕолоон бэлиэтээтэ.

«Маннык боппуруос билигин Сииттэ сэлиэнньэтигэр үөрэтиллэр, билигин биэс ойуур баһаарын умуруоруу үлэтэ бара турар, онтон түөрдэ сирдэринэн холбосто. Өрөбүлгэ тыал күүһүрэрэ күүтүллэр, сөкүүндэҕэ 20 миэтэрэ түргэннээх буолуо диэн сабаҕалыылла. Онон сибээстээн бөһүөлэк таһыгар, уот үөһэнэн барара кутталы үөскэтэр», — диэтэ кини.

Кэбээйи оройуонун баһылыга этэринэн, утары уоту ыытыы кэмигэр сэлиэнньэ иһигэр буруолаах буолара күүтүллэр.

«Онон биһиги билигин хроническай тыынар уорганнарыгар ыарыылаах дьон испииһэктэрин оҥоробут. Аллергиктары, астматиктары уонна кырдьаҕастары бөһүөлэктэн эвакуациялыахпыт. Ол гынан баран, ханна эрэ оройуон киинигэр эбэтэр чугас нэһилиэнньэлээх пуунугар эвакуациялааһын туһунан быһаарыы бүгүн киэһэ эбэтэр сарсын сарсыарда ылыллыаҕа. Эвакуация туһунан быһаарыы билигин да дьоһуннаахтык ылылла илик», — диэн Иван Левин эбэн эттэ.