Степан Саргыдаев Чурапчы улууһун баһылыгынан талылынна

«Биир ньыгыл Россия» баартыйаттан турбут Степан Саргыдаев Чурапчы улууһун баһылыгын быыбарыгар кыайыыны ситистэ. Бу туһунан киин талар хамыыһыйа иһитиннэрэр.

«Быыбарга уопсайа биэс хандьыдаат кытынна, ол иһигэр хандьыдаакка бэйэни туруоруу. Нэһилиэнньэ 59,61%-на куоластаата», — диэн иһитиннэриигэ этиллэр.

Саамай элбэх куолаһы — 62,74%-ны — Степан Саргыдаев ылла. Кыайыытынан Ил Дархан Айсен Николаев эҕэрдэлээтэ.

«Степан Саргыдаев эрэллээхтик кыайыыта биир дойдулаахтарын итэҕэлин көрдөрөр. Салайааччы быһыытынан уопута, дьыалабыай уонна тус хаачыстыбата улуус сайдарыгар төһүү күүс буолуоҕа», — диэн кини бэйэтин Instagram сиэйигэр суруйда.

Быыбарга 24,64% куолаһы ылан иккис миэстэҕэ Николай Попов таҕыста (КПРФ); кини кэнниттэн — 11,85% куоластаах Илья Николаев. (Новые люди)

Роман Егоров (хандьыдаакка бэйэни туруоруу) — 0,26% уонна Евгений Негнюров (ЛДПР) — 0,13%.

Быыбар аһаҕастык ыытылынна, үҥсүү, быыбардыыр сокуону кэһии бэлиэтэммэтэ.

Саргыдаев Степан Анатольевич 1980 сыл от ыйын 13 күнүгэр Чурапчы улууһун Үрүҥ Күөл сэлиэнньэтигэр төрөөбүтэ. 2002 сыллаахха М.К. Аммосов аатынан Саха судаарыстыбаннай үнүбэрсиэтин педагогическай институтун «профессиональнай үөрэтии» исписээлнэһин, 2008 сыллаахха — Уһук Илиҥҥи судаарыстыбаннай сулууспа «судаарыстыбаннай уонна муниципальнай салайыы» исписээлнэһин, 2017 сыллаахха — Россия бэрэсидьиэнин иһинэн норуот хаһаайыстыбатын уонна судаарысытыбаннай сулууспатын Россиятааҕы академиятын «Судаарыстыбаннай уонна муниципальнай салайыы» салаатын бүтэрбитэ.

Үлэтин Чурапчы улууһун гимназиятыгар информатика учууталынан саҕалаабыта.

2005 сыллаахха — Чурапчы улуһун баһылыгын солбуйааччыта;

2006–2010 сс. — Чурапчы нэһилиэгин баһылыгын солбуйааччыта;

2010–2012 сс. — Чурапчы нэһилиэгин баһылыгын социальнай боппуруостарга солбуйааччыта;

2012–2018 сс. — Чурапчы нэһилиэгин баһылыга;

2018–2021 сс. — СӨ ыччат дьыалатын уонна социальнай коммуникациялар миниистирдэрэ;

2021 с. — Чурапчы баһылыгын бастакы солбуйааччытын э.т.