Сунтаар түмэлигэр 20-30-с сылларга үлэлээбит учуутал маллара көрдөрүүгэ турдулар

Аҕатын идэтин  утумнаабыт кырдьаҕас учуутал Раиса Архиповна Саввинова дьиэтэ бэйэтэ түмэл курдук. Аҕата өлөрүгэр төрөөбүтэ 49 хонуктаах кыысчаан күндү киһитин туһунан хаартыскалары, маллары хараҕын харатын курдук харыстыыр.

Ааспыт үйэ 20-30-с сыллардааҕы учуутал Архип Саввиновы ахтар-саныыр күҥҥэ Сунтаардааҕы Үөрэҕирии түмэлигэр илиитинэн суруйбут күннүктэрин, тэтэрээттэрин сэргэ сэдэх хаалтыс туттарар тэрил көрдөрүүгэ турда.

Бэрт мааны, номоҕон көрүҥнээх эдэр киһи олох оргуйар үөһүгэр сылдьыбытын, хоһоон суруйарын  бу үгүс хаартыскалар,  илиинэн суруллубут тэтэрээттэр туоһулууллар.

«Киһини билиэхпиттэн аҕаҥ курдук учуутал буолуоҥ диэн ийэм үөрэппитэ», — диир Раиса Архиповна.

Кырдьаҕас учуутал 51 сыл устата үүнэр көлүөнэни үөрэтиигэ, иитиигэ үлэлээбитэ. Билигин даҕаны 87 саастаах ытыктанар киһи үөрэнээччилэригэр, биир идэлээхтэригэр үтүө сүбэһит.

«Муударай уонна уопуттаах учуутал буолан, уруоктара наһаа интэриэһинэй буолааччылар. Кини олус судургутук, чуолкайдык оҕо өйүгэр тиийэ гына быһаарааччы. Биһиги кини уруогар үөрэнэрбитин олус сөбүлүүр этибит», -диэтэ Сунтаардааҕы алын сүһүөх оскуола дириэктэрин иитэр-үөрэтэр үлэҕэ солбуйааччы Елизавета Алексеева.

Сунтаардааҕы Үөрэҕирии түмэлэ 2012 сыллаахха аһыллыбыта. Тэрийээччи СӨ үөрэҕириитин туйгуна Альбина Иванова айымньылаахтык үлэлиир.