Сунтаар Тойбохойуттан тэйиччи соҕотох борооскуну көрбүттэр

Бүгүн, ахсынньы 7 күнүгэр, Сунтаар улууһун Тойбохой сэлиэнньэтиттэн 8-10 килэмиэтир тэйиччи баар сиргэ соҕотох борооскуну көрбүттэр.

Кыстыкка алаастарыттан от тиэйэ сылдьан Тойбохой олохтоохторо бу борооскуну көрбүттэр. Хомойуох иһин, дьоҥҥо туттарбатах, чугаһаабатах. Онон нэһилиэнньэлээх пууҥҥа төннөллөрүгэр от хаалларан кэлбиттэр. Хаартыскатын нэһилиэктэрин WhatsApp социальнай ситим нөҥүө бөлөхтөргө тарҕаппыттар, дьаһалтаҕа биллэрбиттэр.

«Нэһилиэктэн 8-10 килэмиэтир тэйиччи сиргэ соҕотох сылдьар борооскуну көрбүттэрин туһунан иһитиннэрии киирдэ. Хаартысканан хаһаайыттара быһаарыллыбата, онон сарсын олохтоохтор күүстэринэн быыһыыр этэрээт тэриллэн борооскуну тутарга былааннаатыбыт. Нэһилиэк дьоно сабаҕалыырынан, бу борооску сиргэ төрөөн кыыллыйбыт буолуон сөп», — диэтэ Тойбохой нэһилиэгин баһылыга Иван Попов.