Таатта Кыйытыгар 90 миэстэлээх саҥа оскуола тутуллар

Таатта улууһун Кыйы сэлиэнньэтигэр Россия бэрэсидьиэнэ Владимир Путин көҕүлээһининэн олохтоммут «Үөрэҕирии» национальнай бырайыак чэрчитинэн икки этээстээх 90 миэстэлээх оскуола тутуута бара турар. Бу туһунан СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.

«Саҥа үөрэх кыһата бары аныгы ирдэбилгэ эппиэттиир уонна доруобуйаларынан хааччахтаах дьон сылдьарыгар тоҕоостоох оборудованиеларынан хааччыллар», — диэн этиллэр.

Тутуу уопсай иэнэ 2 757 квадратнай миэтэрэҕэ тэҥнэһэр.

Оскуола блоктарга арахсар: бастакы этээскэ — алын кылаастар, мастерской, лаборатория, медицинскэй кабинет уонна пищеблок, иккис этээскэ — администртивнай уонна үөрэнэр кэбиниэттэр, спортивнай уонна аактабай саалалар. Оскуола тиэргэнигэр сүүрэр суол, турниктар уонна спортивнай былаһаакка баар буолуоҕа.

Саҥа оскуола 2021 сыл атырдьах ыйыгар үлэҕэ киирэрэ күүтүллэр. Тутуу үлэтэ болдьохтон хаалбат. Бүгүҥҥү күҥҥэ эргэ оскуола дьиэтэ көтүрүлүннэ уонна саҥа тутуу көҥдөйө таһаарылынна.