Томпо улууһуттан кэлбит үрүҥ эһэ туһунан бэтэринээрдэр быһаарыылара билиннэ

Томпо улууһуттан үрүҥ эһэни «Орто Дойду» зоопаркатыгар аҕалбыттарын кэннэ бэтэринээр быраас көрдө.

Исписэлиис этэринэн, харамай, быһа холоон, икки саастааҕа, тыһы буолара билиннэ.

«Туруга ортону аннынан, аллараа хаҥас аһыыта суох», — диэн быһаарыыга этиллэр.

Кээмэйэ, зоопаркаҕа төрөөбүт үрүҥ эһэ оҕотугар, балтараалаах Алмааска тэҥ, ол эрэн баппаҕайа кырата бэлиэтэннэ.

СӨ экологиятын миниистирэ Сахамин Афанасьев иһитиннэрбитинэн, эһэни чинчийээри уонна эмтээри Москва зоопаркатыгар илдьэри былаанныыллар. Билиҥҥи туругунан, тиэйэн илдьии схемата оҥоһуллар.