ТОР резиденнэрин уонна Арктика балаһатын бырайыактарыгар 124 млрд солкуобайы инвестициялаатылар

Урутаан сайдыы резиденнэрин уонна Россия Арктическай балаһатын бырайыактарыгар инвестиция уопсай кээмэйэ 124 миллиард солкуобайга тэҥнэстэ.

Бу туһунан «Кангалассы» индустриальнай паарка дириэктэрэ Николай Потапов ProДФО онлайн-форум түмүктүүр «Экономические точки роста регионов ДФО в условиях пандемии — системные выводы и вызовы» дьүүллэһиигэ иһитиннэрдэ.

«Биһиги хамаандабыт Дьокуускайга икки ТОР-у кытта үлэлиир. Билиҥҥи туругунан,ТОР резиденнэрин уонна Арктика балаһатын бырайыактарыгар 124 млрд солкуобайы инвестициялаатылар. Аҕыс тыһыынча кэриҥэ үлэ миэстэтэ тэрилиннэ, уон тыһыынча эбии былааннанар», — диэтэ кини.

Николай Потапов бэлиэтээбитинэн, өрөспүүбүлүкэҕэ дьоҕус уонна орто урбаан эрэһиимэ тарҕанарын туһугар 2,1 тыһыынча квадратнай миэтэрэ иэннээх ТОР «Якутия» дьиэтэ тутуллуоҕа.

«Комплекс икки эбийиэктээх, манна бырайыактарын олоххо киллэрэллэригэр улахан суумматтан саҕалыыр кыахтара суох дьоҕус уонна орто урбаан тэрилтэлэрэ киириэхтэрэ. Бу көмөтүнэн кинилэр бэйэлэрэ туспа оҥорон таһаарар собуоттары аһыахтарын сөп», — диэтэ кини.

14 производственнай хостордоох эбийиэк кэлэр ыйдарга үлэҕэ киирэрэ былааннанар, онтон салгыы үлэ киэҥ далааһыннаныаҕа.