Туйахтаах кыылы бултуурга көҥүлү ылыыга электроннай өҥө олохтонуо

Саха сиригэр кэлиҥҥи сылга туйахтаах кыылы бултуурга көҥүлү ыларга электроннай өҥө киирэн, уочаракка күнү быһа турбат буоллулар. Сэрэбиэй буолуор диэри, үс ый иннинэ e-yakutia.ru диэн сайт нөҥүө сайаапка биэриэххэ сеп.

Сайтка судаарыстыбаннай өҥө порталыгар регистрацияны ааспыт киһи киириэн сөп. Бу саҥа сүүрээн сүрүн сыала хайа да булчут күөмчүлэммэтин диэн. Сокуон маҥнайгы ааҕыыта муус устарга буолан ааспыта.

«Дьокуускай куоракка 20% хааллар, 80 %-на улуустарга барар. Онон манна туйахтаах кыылга бултуур лицензия аҕыйах буолан, барыларыгар тиксибэт. Биһиги уларытыы киллэрэн, өрөспүүбүлүкэ үрдүнэн биир уопсай сэрэбиэй оҥоруохпутун баҕарабыт. Туох баар улуустары барыларын киллэрэбит, бырагыраама бэйэтэ лотерея курдук таһаарар», — диэн СӨ Экология министиэристибэтин булт хаһаайыстыбатын департаменын салайааччыта Дьулустаан Дьяконов кэпсээтэ.

Бултуон баҕарар киһи сайаапка биэрбитин кэннэ туһуламмыт күҥҥэ сэрэбиэй оонньотоллор. Ону көмпүүтэр кимиэхэ тиксэрэрин бэйэтэ быһаарыахтаах. Маны таһынан баҕалаах булчут лицензияҕа хайдах тиксиэхтээҕин толкуйдууллар. Биир хайысханан сэрэбиэйинэн быһаарыы ньыматын  көрөллөр, ол эрэн сорох булчут сөбүлэспэт.

«Интернет ситимигэр киирэр кыах барыларыгар баар буолбатах. Төлөпүөн да сибээһэ мөлтөх, интернет ситимэ эмиэ», — диэн Ытык Күөл олохтооҕо Сергей Дорофеев санаатын үллэстэр.

Быйыл ол ыйын 27 күнүгэр интернет сайтын нөҥүө электроннай уочаратынан, туйхатаах кыылларга көҥүлү биэрии буолан ааспыт. Манна Дьокуускайтан 1400 киһи тиксэн, өрөспүүбүлүкэ улуустарыгар бултуур көҥүл ылбыттар.

«Билигин төһө бырыһыанын улуустарга быһаччы ыытарбытын, төһөтө өрөспүүбүлүкэ таһымыгар дьаһаллыахтааҕын чопчулуохтаахпыт», — диэн Саха өрөспүүбүлүкэтин Ил Түмэн сир сыһыаннарыгар, айылҕа баайыгар уонна экологияҕа кэмитиэтин бэрэссэдээтэлэ, норуот дьокутаата Владимир Прокопьев эттэ.

Ахсынньы ыйга Ил Түмэн сессиятыгар киирэн баран, сокуон иккис ааҕыытын аастаҕына, кэлэр сыл муус устар ый саҕаланыытыгар диэри силигэ ситиэхтээх. Оччотугар аны сайын электроннай уочарат оннугар лимииттэммит кыылларга сэрэбиэй буолуоҕа.