Тулагыга пассажирдардаах автобус суолтан туораабыт

Бүгүн, муус устар 9 күнүгэр Тулагы сэлиэнньэтигэр 104-с №-дээх маршрутнай автобус суолтан туорааһыныгар биир киһи эмсэҕэлээбит. Бу туһунан киин куорат дьаһалтатын пресс-сулууспата иһитиннэрэр.

«Эмсэҕэлээбит дьахтары суһал көмө сулууспата илдьэ барбыт. Билигин кинини МУП «ЯПАК» үлэһитэ балыыһаҕа арыаллыыр», — диэн чуолкайданар.

Автобус Николаева уулуссатыгар «Дорожнай маҕаһыын» тохтобул аттыгар суолтан туораабыт. 20 пассажир «Дьокуускай-Киллэм-Дьокуускай» хайысханан сылдьар 105-с №-дээх автобуска көспүттэр.

Саахал төрүөтүнэн суол усулуобуйата уустугуруута буолбут. Суоппар айан түргэнин үрдэппэтэҕэ, ону GPS дааннайдара бигэргэтэллэрэ бэлиэтэнэр.