Тускул билгэтэ: Алтынньы 5-10 күннэригэр халлаан туруга

Алтынньы 5 күнүттэн 10 күнүгэр диэри халлаан туруга хайдах буолуой? Норуот синоптига Тускул кэлэр нэдиэлэтээҕи күн-дьыл туругун туһунан билиһиннэрдэ.

«Киин улуустарга билигин күнүһүн сылаас, түүнүн тымныйан эрэр. Түүнүн -6-5 кыраадыс буоллаҕына, күнүскү өттүгэр +3+4 кыраадыс. Кэлэр сэрэдэ уонна чэппиэр диэки күнүһүн -2-4 кыраадыс, түүнүн -8-9 кыраадыс буолуоҕа. Бэнидиэнньиккэ, оптуорунньукка хаардыаҕа.

Бүлүү бөлөх улуустарыгар эмиэ күнүһүн сылаас турар, ол курдук +3+4, түүнүн -2-1 кыраадыс. Ол гынан баран кэлэр сэрэдэ, чэппиэр диэки эмиэ тымныйыаҕа. Түүҥҥү өттүгэр -8-9, күнүһүн -4-3 кыраадыс буолара күүтүллэр. Субуотаттан саҕалаан Бүлүү эҥээр улуустарыгар хаардаах да, ардахтаах да буолуоҕа.

Соҕуруулуу-арҕаа улуустарга күнүскү өттүгэр халлаан сылаас турар. Күнүһүн +5+6 кыраадыс, түүнүн +2+1 кыраадыс. Сэрэдэ, чэппиэр диэки түүҥҥү өттүгэр -2-6 кыраадыска тэҥнэһиэ, күнүскү өттүгэр +1+2 кыраадыс буолуоҕа. Нэдиэлэ устата ардах, хаар түһүө.

Өймөкөөн диэки лаппа тымныйда. Күнүс да, түүн да тымныы. Түүнүн -14-15 кыраадыс, күнүһүн -8-9 кыраадыс. Кэлэр нэдиэлэҕэ түүнүн -12-9, күнүһүн -6-5 кыраадыс буолуоҕа.

Дьааҥы диэки эмиэ тымныйда, кыһыҥҥылыы күн-дьыл кэлэн эрэр. Түүн -10-11 кыраадыс, күнүс -5-6 кыраадыс. Нэдиэлэ ортотугар күнүһүн -6-7 кыраадыска тэҥнэһиэ. Бэнидиэнньик күн хаардаах буолуоҕа.

Индигиир-Халыма эҥээр эмиэ тымныйан турар. Түүнүн -10-11 кыраадыс, күнүһүн -5-6. Кэлэр нэдиэлэҕэ күнүһүн -6-8 кыраадыс буолуоҕа. Ол гынан баран олох сөҥүүтэ суох күннэр тураллар. Кыһыҥҥылыы тымныы күннэр саҕаланан эрэллэр.

Арҕаа улуустарга күнүһүн арыый да сылаас курдук. Түүнүн -7-6 кыраадыс, күнүһүн -3-4. Кэлэр нэдиэлэ бүтүүтэ улахан буурҕа түһэрэ сабаҕаланар.

Алтынньы ый 5 күнэ — ыйга куһаҕан күн. Онон ыраах айаҥҥа, саҥа дьыаланы саҕалыырга, кэпсэтиини ыытарга сэрэхтээх буолуҥ», — диэн Тускул түмүктээтэ.