Тыа хаһаайыстыбатыгар оҥорон таһаарыыны сайыннарыыга эбии 500 мөл. солкуобай көрүллүөҕэ

2022 сылга тыа хаһаайыстыбатыгар оҥорон таһаарыыны сайыннарыыга эбии 500 мөлүйүөн солкуобай көрүллүөҕэ.

Бу туһунан Ил Дархан Айсен Николаев Ил Түмэҥҥэ туһаайыытыгар иһитиннэрдэ.

Кини кэнники үс сылга тыа сиригэр олорор дьону-сэргэни социальнай хантыраагынан өйөөһүн кээмэйэ үс төгүл кэриҥэ улааппытын кэпсээтэ. Ол курдук, быйыл өрөспүүбүлүкэ үрдүнэн уопсайа 500 мөлүйүөн солкуобай суумалаах көмөнү биэс тыһыынчаттан тахса ыал туһаммыт.

«Эһиил социальнай хантыраак кээмэйин 600 мөлүйүөн солкуобайга диэри тиэрдэргэ уонна кэтэх хаһаайыстыбаны сайыннарыыга көмө кээмэйин 200 тыһыынча солкуобайга диэри улаатыннарарга соруйабын. Тыа хаһаайыстыбатын бородууксуйатын оҥорон таһаарааччыларыгар агропромышленнай комплексы өйөөһүн пуондатын нөҥүө эбии 500 мөлүйүөн солкуобай тыырыллыаҕа», — диэтэ өрөспүүбүлүкэ баһылыга.

Маны таһынан, эбии 500 мөлүйүөн инвестицияҕа көрүллүөҕэ: хотон, сылгы базатын уонна оҕуруот аһын харайар сири тутууга субсидия быһыытынан.

Айсен Николаев бу үп барыта саҥа үлэ миэстэтин таһаарыыга, тыа хаһаайыстыбатын бородууксуйатын кээмэйин улаатыннарыыга үлэлиэхтээҕин бэлиэтээтэ. Кинилэр көдьүүстэрин үрдэтиигэ аныгы тыа хаһаайыстыбатын тиэхиньикэтин, технологияны, сиэмэни, уоҕурдууну атыылаһыыга, ол иһигэр «Туймаада» агрохолдинг кыаҕын туһанан лизинговай хамсааһыннары тэрийэр былаан баар.