Учуутал күнүн көрсө уһуйааччыларга судаарыстыбаннай наҕараадалары туттардылар

Аан дойдутааҕы учуутал күнэ быйыл 55-ис төгүлүн бэлиэтэнэр. 1994 сыллаахха Холбоһуктаах нациялар тэрилтэлэрин быһаарыытынан норуоттар икки ардыларынааҕы бырааһынньык баар буолбута.

Педагогическай уопсастыбаннас бүгүн учуутал пааматынньыгар сүгүрүйдэ. Учууталлар идэлээх бырааһынньыктарын көрсө ыытыллыбыт түмсүүгэ бэтэрээн педагогтар, эдэр уһуйааччылар, устудьуоннар кэллилэр. Үөрэхтээһин сайдыытыгар үтүмэн кылааттарын киллэрбит үтүө дьону ахтан-санаан аастылар. Үөрэх миниистирэ Владимир Егоров истиҥ эҕэрдэтин этэн туран, учууталлар өрөспүүбүлүкэ сайдыытыгар улахан өҥөлөөхтөр диэтэ.

Айымньылаах үлэлэринэн ыччаты уһуйар үтүөкэн учууталларга судаарыстыбаннай наҕараадалары туттардылар. Бочуоттаах ааты, түөскэ анньыллар бэлиэни, махтал суруктары сүүрбэттэн тахса уһуйааччыга бэрилиннэ.

«Өрөспүүбүлүкэ педагогтара дойду таһымыгар Саха сирин өрүү ааттаталлар. Сыралаах үлэлэринэн уонна идэлэрин толору баһылаабыт буолан, сыллата оскуоланы бүтэрээччи оҕолор биир кэлим эксээмэни сүүс баалга суруйаллар, Бүтүн Россиятааҕы уонна норуоттар икки ардыларынааҕы олимпиадаларга кыайаллар », — диэн бырабыыталыстыба бэрэссэдээтэлин солбуйааччы Ольга Балабкина бэлиэтээтэ.