Удачнайга гаражка буолбут баһаарга биир киһи өлбүт

Миирнэй оройуонун Удачнай куоратыгар буолбут баһаарга биир киһи өлүгүн булбуттар. Бу туһунан регионнааҕы ЫБММ пресс-сулууспата иһитиннэрэр.

Баһаар тохсунньу 13 күнүгэр олохтоох бириэмэнэн 09.22 чааска Надежный түөлбэҕэ буолла.

«Баһаарынай сулууспа баһаар миэстэтигэр түөрт мүнүүтэнэн кэлбит. Кинилэр кэлиилэригэр тутуу аһаҕас уотунан умайа турбут. 50 кв.м. иэннээх баһаары тохтоппуттар. Баһаар түмүгэр гараж уонна массыына эмсэҕэлээбит», — диэн иһитиннэриигэ этиллэр.

Баһаар миэстэтигэр 1978 сыл төрүөх эр киһи өлүгүн булбуттар.

Баһаар биричиинэтэ, буруйдаах уонна хоромньу быһаарыллар.Уоту умуруорууга икки баһаарынай массыына, личнай састааптан аҕыс киһи үлэлээтэ. Икки аттыгар турбут гараж быыһанна.

Миэстэтигэр силиэстийэлиир-суһал бөлөх уонна Россия ЫБММ дознавателэ үлэлии тиийдилэр.