Уус Алдан дьиэ кэргэнигэр «Үйэ оҕолоро» сертификаты туттардылар

Уус Алдаҥҥа бастакы төрөөбүт оҕолору үөрүүлээх быһыыга-майгыга таһаардылар. Бу туһунан «Саха» НКИХ иһитиннэрэр.

Тохсунньу 9 күнүгэр, Уус Алдаҥҥа Бороҕон роддомугар сарсыарда 4304,0 ыйааһыннаах, 55 см уһуннаах кыыс оҕо күн сирин көрбүтэ. Элбэх оҕолоох Мичийэ уонна Тарас Арсентьевтар кыыс оҕоломмуттара.

Эдэр ыалга Саха АССР төрүттэммитэ 100 сылыгар быйылгы сылга төрөөбүт кырачааннарга Саха сирин Ил Дархана Айсен Николаев көҕүлээбит «Үйэ оҕолоро» диэн бырагырааманан 100 тыһ. солк. суумалаах тус сыаллаах хапытаал сертификат туттардылар.

«Кыыспытын Эля диэн ааттаатыбыт. Өрөспүүбүлүкэҕэ оҕо төрүүрүн, дьиэ кэргэн ууһуурун-тэнийэрин өйүүллэрэ олус үчүгэй. Итинник көмө эдэр ыалга наһаа наадалаах дии саныыбын. Улууска быйыл аан бастаан оҕолонор дьолу биллим. Төрөппүттэрбэр, кэргэммэр, аймахтарбар, чугас дьоммор махтанабын!», — диэн Мичийэ Арсеньтева эттэ.

Төрөппүттэр Уус Алдан улууһун Найахы нэһилиэгиттэн төрүттээхтэр, түөрт оҕолоохтор: икки кыыс, икки уол.

Бороҕон роддомугар кырачааны үөрүүлээх быһыыга-майгыга дьиэлэригэр таһаарыы буолла. Найахы нэһилиэгин дьаһалтатын аатыттан 20 тыһ. солк. суумалаах сертификаты баһылык Петр Слепцов туттарда.