Уус Алдан олохтооҕо 100 сааһын туолла

Педагогическай үлэ бэтэрээнэ, РСФСР үөрэҕириитин туйгуна, Учууталлар учууталлара Матрена Гоголева 100 сааһын туолла. Киниэхэ «Үйэ саас» бэлиэтин туттардылар уонна улуус бочуоттаах олохтооҕун аатын иҥэрдилэр. Кини 40-тан тахса сиэннээх, хос сиэннээх, хос-хос сиэннээх.

Матрена Семеновна 1922 сыллаахха тохсунньу 15 күнүгэр төрөөбүт. Аҕа дойду Улуу сэриитин кэмигэр Дьокуускайдааҕы педагогическай колледжка үөрэммит. Онтон 1942 сыллаахха Хоро оскуолатыгар алын кылаас учууталынан үлэтин саҕалаабыт. Оҕо саадыгар баспытааталынан, Танда оскуолатыгар учууталынан уонна Мүрү орто оскуолатыгар алын кылаас учуутадынан 42 сыл үлэлээбит.

Кини 2002 сыллаахтан Слепцовтар педагогическай династияларын төрүттээччи буолар. Матрена Семеновна уонна Алексей Николаевич түөрт оҕотуттан иккитэ 43 сыл ыстаастаах учууталлар, элбэх сиэннэрэ, хос сиэннэрэ эмиэ учуутал идэтин талбыттар.