Уус Алдан үөрэнээччитэ бытыылкаттан дьиэҕэ-уокка туттуллар тэриллэри оҥорор

Бу күннэргэ В.П. Ларионов аатынан өрөспүүбүлүкэтээҕи «Инникигэ хардыы» научнай-практическай конференция буола турар.

Уус Алдантан элбэх оҕо кыттыыны ыла сылдьар. Олортон биирдэстэрэ В.В. Алексеев аатынан Мүрүтээҕи «Уолан» гимназия 6 кылааһын үөрэнээччитэ Новомир Сивцев «Рециклинг ПЭТ бутылок на дому» диэн интэриэһинэй тиэмэтинэн кытынна.

«Аан дойду үрдүнэн биир киһи 37 кг пластиковай бөх быраҕыан сөп эбит. Онтон Уус Алдан олохтоохторо 757 тонна бөҕү быраҕаллар эбит биир сылга. Бу бөхтөн саамай ордук быраҕыллар эбит пластиковай бутылка. Ол санааттан мин рециклинг көмөтүнэн бутылкаттан туһалаах маллары оҥорорго былааннаммытым. Ол курдук, бытыылкалартан ПЭТ-лиэнтэни быһан, буруус маска көннөрөн, оһоххо ититэн, тэҥнээн, холбоон сиппиир уонна сиэккэ (сетка-рабица) оҥордум. Үлэм үп-харчы өттүнэн барыстаах буолан таҕыста. Үчүгэй сиппиир сыаната маҕаһыыҥҥа 400 солк. Биһиги сиппиири оҥорорго 13 бытыылканы (0 солк.), түөрт сурууп (4 солк.), маһа (100 солк.) электрическэй энергия (1 солк.) тутуннубут. Уоспайа 105 солк. буолла. Сиэккэ (сетка-рабица) оҥорорго биэс бытыылканы уонна электрическэй энергия (1 солк.) туһанным. Маҕаһыыҥҥа 1 кв.м. сиэккэни 99 солк. атыылыыллар», — диэтэ Новомир Сивцев.

Быйылгы конференцияҕа өрөспүүбүлүкэ 34 улууһуттан уонна куораттарыттан, барыта холбоон 35 сиэксийэҕэ 1816 үөрэнээччи кыттар. Кинилэр уопсайа 1610 үлэни көмүскүөхтэрэ. Экспертнэй хамыыһыйаҕа 346 учуонай, аспираннар, магистраннар уонна устудьуоннар киирдилэр. Тэрээһин иккис сылын онлайн-форматынан ыытыллар.

Быйылгыттан куонкурус Россия үөрэҕириитин тэрээһиннэрин ахсааныгар киирэн кыттыылаахтарга өйөбүл үрдээтэ. Ол курдук, лауреаттар тус ситиһиилэрэ үрдүк үөрэх кыһаларыгар киирэргэ БКЭ түмүктэрин баалларыгар эбиллэр.