Уус Алдан улууһун Хомустаах бөһүөлэгин хочуолунайын саҥардыахтара

Уус Алдан улууһун Хомустаах бөһүөлэгэр 1978 сылтан үлэлии турар хаарбах туруктаах хочуолунай үлэтин бу сыл бүтүүтэ тохтотор буоллулар. Ол оннугар суһаллык СӨ ОДьКХ инвестиционнай бырагырааматыгар киллэрэн, ирдэбилгэ эппиэттиир саҥа хочуолунайы тутан, бу сыл бүтүүтэ үлэҕэ киллэриэхтэрэ

«1978 сыллаахха тутуллубут хара чоҕунан оттуллар хаарбах туруктаах киин хочуолунай билигин хайа да ирдэбилгэ эппиэттээбэт буолан турар. Ол да буоллар, аҕыс эбийиэги, ол иһигэр: биир чааһынай, икки муниципальнай дьиэлэри, биэс социальнай эбийиэги ититиинэн хааччыйар. Онон суһаллык ОДьКХ инвест бырагырааматыгар киирэн, Уус Алданнааҕы салаа бэйэтин күүһүнэн тутуу үлэтэ бара турар», — диэн ОДьКХ Уус Алданнааҕы салаатын сүрүн инженерэ Петр Копырин кэпсээтэ.

Хомустаах бөһүөлэгин улахан аҥаарын ититиинэн хааччыйыан сөптөөх 3,75 мегаватт кыамталаах, тимир каркастаах, 189 кв миэтэрэ иэннээх хочуолунай тутуута олохтоох Хомустаах уонна Кэптэни бөһүөлэктэрин коммунальнай хаһаайыстыбатын үлэһиттэрин күүһүнэн ыытыллар. Ону сэргэ Уһун Күөл, Тумул уонна Майаҕас бөһүөлэктэртэн биир идэлээхтэрэ анал биригээдэнэн кэлэн көмө оҥороллор.

«Былаан быһыытынан, саҥа ирдэбилгэ эппиэттиир хочуолунай бу сыл бүтүүтэ үлэҕэ киириэхтээх. Билиҥҥи туругунан, бетоннуур үлэ ыытылла турар. Онтон салҕыы хочуолунай каркаһын таҥан туруордахтарына, иһинээҕи оборудованиетын таҥар үлэ саҕаланыа», — диэн СӨ ОДьКХ уонна энергетика миниистирин бастакы солбуйааччы Вячеслав Емельянов эттэ.