VI-с өрөспүүбүлүкэтээҕи «Алыптаах мааска» норуот тыйаатырдарын куонкуруһа түмүктэннэ

Сунтаарга ыытыллыбыт VI-с өрөспүүбүлүкэтээҕи «Алыптаах мааска» норуодунай тыйаатырдар бэстибээл-куонкурустарыгар Мэҥэ Хаҥалас улууһун Майа сэлиэнньэтин Д.Ф. Ходулов аатынан тыйаатыра Кылаан бирииһи ылла.

 «Алыптаах мааска» норуот тыйаатырдарын куонкуруһун 12 сыл анараа өттүгэр Сунтаарга Юрий Очосов төрүттээбит. Быйылгыттан өрөспүүбүлүкэ таһымыгар ыытыллыбыт.

«Быйыл, хаһааҥҥытааҕар да элбэх, 18 үлэ киирдэ. Онлайн көрүү кэнниттэн 11 үлэ талыллыбытыттан аҕыс тыйаатыр кэлэн кытынна. Ол курдук, Мэҥэ Хаҥалас улууһун Аллараа Бэстээх уонна Майа сэлиэнньэтиттэн, Хаҥалас улууһун Өктөм уонна Күөрдэм айымньыларын дьиэлэриттэн, Ньурба Дьаарханын уонна Антоновка, Амма Абаҕатын норуот тыйаатырдарыттан уопсайа 135 киһи кыттыыны ылла. VI-с өрөспүүбүлүкэтээҕи «Алыптаах мааска» норуодунай тыйаатырдар бэстибээл-куонкурустарыгар Мэҥэ Хаҥалас улууһун Майа сэлиэнньэтин Д. Ходулов аатынан тыйаатыра Кылаан бирииһи ылла, Москва куоракка Саха сирин аатын көмүскүү барар чиэскэ тигистэ», — диэтэ Сунтаар улууһун култууратын управлениетын салайааччыта Мария Кобельянова.

Д. Ходулов аатынан тыйаатыр режиссера Данил Осипов Прасковья Адамова — Күн Чүүйэ, Иннокентий Сергучев суруйууларыгар «Ытык иэс» испиктээкили Сэбиэскэй Сойуус дьоруойа Федор Кузьмич Попов сүүс сылыгар анаан туруорда.

«Эрдэ Прасковья Адамова‒Күн Чүүйэ, Иннокентий Сергучев суруйууларыгар «Ытык иэс» испиктээкил сахаттан бастакы ССРС норуодунай артыыһа, Дьоруой биир дойдулааҕа Д.Ф. Ходулов аатынан норуодунай тыйаатыр толоруутугар Кыайыы 30 сылыгар, ол аата 1975 сыллаахха, бастакытын сыанаҕа туруоруллубута. Режиссерунан ‒ биир дойдулаахпыт, Саха тыйаатырын артыыһа Прасковья Адамова ‒ СӨ норуодунай артыыската буолбута. Ол кэннэ Кыайыы 50 сылыгар, 1995 сыллаахха, «Ытык иэһи» норуодунай тыйаатыр режиссера, билигин СӨ култууратын үтүөлээх үлэһитэ Анна Охлопкова туруорбута. Данил Осипов бастакы улахан ситиһиитэ, онон астынабыт, киэн туттабыт. Оскуола үлэһиттэрин, нэһилиэк олохтоохторун түмэ тардан айымньылаахтык үлэлиир», — диэтэ Д. Ходулов аатынан тыйаатыр дириэктэрэ Василий Винокуров.

Түмүгэр, Василий Павлович кыттааччылар айаннарыгар көмөлөспүт дьоҥҥо, Мэҥэ Хаҥалас улууһун дьаһалтатыгар махтанарын туһунан эттэ.