VIII-с спортивнай оонньуулар квалификационнай күрэхтэрэ саҕаланна

Билигин Саха сирин норуоттарын VIII-с оонньууларын Тэрийэр кэмитиэтин салайааччыта, СӨ бырабыыталыстыбатын бэрэссэдээтэлин солбуйааччыта Сергей Местников Уус Алдаҥҥа ыытыллыахтаах квалификационнай күрэхтэр саҕаламмыттарын туһунан иһитиннэрдэ.

«Былырыын ахсынньыга СӨ физическэй култуура уонна спорт министиэристибэтэ Оонньуулар күрэхтэһиилэрин бигэргэппитэ. Салгыы бу халандаар хаамыытынан бэс ыйыгар диэри 23 күрэхтэһии ыытыллыаҕа. Оонньуулар бырагыраамаларыгар 16 спорт көрүҥэ баар: 3х3, волейбол, мини-футбол, чэпчэки атлетика, остуол тенниһэ, хапсаҕай, дуобат, саахымат, оҕунан, буулдьанан ытыы, гиирэ, спортинг, буокса, чэпчэки атлетика (параолимпийскай уонна сурдлимпийскай бырагыраама) уонна «ГТО» многоборьета», — диэтэ кини.

Бэрэссэдээтэли солбуйааччы бэлиэтээбитинэн, марафонтан уонна ГТО многоборьетыттан ураты квалификационнай күрэх спорт бары көрүҥэр ыытыллыаҕа.

«Оонньууларга путевка бастакынан көҥүл тустууга оонньонно. Тохсунньу 8-9 күннэригэр Аллараа Бэстээх бөһүөлэгэр көҥүл тустууга биирдиилээн уонна хамаанданан бастыыр иһин Н.Н. Тарскай кэриэһигэр өрөспүүбүлүкэтээҕи чемпионат буолан ааста. Манна 29 хамаанда, 293 спортсмен кытынна, уон ыйааһыҥҥа 80 путевка оонньонно. Бу көрүҥҥэ кулун тутарга уонна муус устарга өссө икки квалификационнай күрэхтэһии буолуоҕа. Манна хас биирдии ыйааһыҥҥа түөртүү путевка оонньонуоҕа», — диэн Сергей Местников бэлиэтээтэ.

Олунньу 16-20 күннэригэр Ленскэй оройуонугар мини-футбол (I-гы лига) Саха сиринээҕи чемпионатыгар кэтэһиилээх путевка оонньонуоҕа. Оттон олунньу 21-тэн 26 -гар диэри Дьокуускайга А. Петров кэриэһигэр буокса Саха сиринээҕи чемпионата ыытыллыаҕа. Ону тэҥэ, олунньу 23-тэн 27-гэр диэри нуучча дуобатыгар киин куоракка СӨ хамаанданан чемпионата буолуоҕа.