НВК «Саха» байыаннай кэрэспэдьиэнэ, араадьыйа дириэктэрэ, спортивнай суруналыыс Николай Бястинов «Звезда Дальнего Востока» бириэмийэ «Красная строка» анал аатын кыайда. Куонкурус быйылгы тиэмэтинэн Донбаһы чөлүгэр түһэриини уонна байыаннай эпэрээссийэ сиригэр волонтерствоны талбыттар.
«Куонкурус финалистарын сэттэ киһиттэн талбыттар. Миигин СВО-ттан репортажтарым иһин эрэ буолбакка, Биир кэлим координационнай киини кытта Россия Дьоруойа, танкист Филипп Евсеев аатын экипажка баарын чуолкайдаабыппыт иһин биэрбиттэр эбит. Бастаан кини «Алеша» таанка экипаһын испииһэгэр суоҕа», — диэтэ Николай Бястинов.
Быйыл лауреаттары биэс номинациянан таллылар: «Все для победы», «Вузы для СВО», «Красная строка», «Волонтерство» уонна «Новаторство». Москваҕа ахсынньы 7 күнүгэр наҕараадалааһын буолуоҕа.
Санатан эттэххэ, СВО саҕаланыаҕыттан ыла, НВК «Саха» военткордара саха байыастара хайдах сылдьалларын уонна биир кэлим координационнай киин үлэтин туһунан сырдаталлар.
