Ярославскай аатынан Кыраайы үөрэтэр түмэли өрөмүөннүөхтэрэ

Киин куоракка Ем. Ярославскай аатынан кыраайы үөрэтэр түмэли өрөмүөннүөхтэрэ. Бу туһунан өрөспүүбүлүкэ баһылыгын иһинэн үлэлиир куорат тутуутун уонна архитектуратын управлениетын пресс-сулууспата иһитиннэрэр.

Атырдьах ыйын 3 күнүгэр «LETO» куорат эйгэтин боппуруостарын баһаарар кииҥҥэ үлэ хаамыытын быһаарсар көрсүһүү буолла.

Манна түмэл, куорат тутуутун уонна архитектуратын управлениетын, Саха сирин култуурунай нэһилиэстибэтин департаменын уонна судаарыстыбаннай сакаастааччы сулууспатын бэрэстэбиитэллэрэ кыттыыны ыллылар.

Дьиэ историческай уобараһын чөлүгэр түһэрии уонна түмэл таһынааҕы сири-уоту тупсарыы боппуруостарын дьүүллэстилэр.

Түмэли тэрийии үлэтэ уобаластааҕы статистика кэмитиэтин сэкирэтээрэ А. И. Попов көҕүлээһининэн 1887 сыллаахха саҕаламмыта. Дьиэ бэйэтэ 1924 сыллаахха баар буолбута. 2004 сыллаахха быыстапка былаһааккатын кэҥэппиттэрэ, ону тэҥэ 1000 квадратнай миэтэрэ иэннээх дьиэҕэ эбии тутууну үлэҕэ киллэрбиттэрэ.

«Түмэл Сүрүн куорпуһун тас көстүүтэ сөргүтүөллэҕэ. Маны таһынан, аттынааҕы сирэ тупсарыллан оҥоһуллуоҕа. Биһиги коллегаларбыт архитектордар уонна дизайнердар көмөлөһөллөрө үөрдэр», — диэтэ Ем. Ярославскай аатынан түмэл дириэктэрэ Николай Бугаев.