НВК САХА — Ааспыт субуота түүн Мииринэй оройуонун Арыылааҕар тыатааҕы ас көрдөөн тэрилтэ ыскылаатыгар киирбит. 28 саастаах харабыл кыыс тыаһы-ууһу истэн, ким эрэ куотан иһэрин көрөн сырсыбыт.
Онтон эһэ буоларын көрөөт, куоппут. Эһэ кыыһы сырсыбыт, ситэн ылан көхсүн хайа тардыбыт. Ол кэннэ ойуур диэки куоппут.
Сылаас кууркалаах буолан, дьолго, кыыс улаханнык эчэйбэтэх.
НВК САХА — Дьокуускайтан быыһааччылары илдьэ, «Полярные авиалинии» Ми-8 бөртөлүөтэ Ан-2 сөмөлүөт түһэргэ күһэллибит сиригэр көттө.
Сөмөлүөт түспүт сиригэр эрдэ көппүт бөртөлүөт сатаан булбатах. Ол иһин Ан-26 сөмөлүөтү ыыппыттар.
«Ан-26 сөмөлүөт Ан-2 сөмөлүөт ханна баарын булбут, туочукатын уонна координаттарын быһаарбыт. Билигин быыһыыр биригээдэни илдьэ бөртөлүөт көттө», — диэн «Полярные авиалинии» авиахампаанньа бэрэстэбиитэлэ иһитиннэрдэ.
Санатар буоллахха, чааһынай хампаанньа Ан-2 сөмөлүөтэ Кэбээйи улууһун Сэбээн Күөл таһыгар түһэргэ күһэллибитэ, сөмөлүөккэ үс пассажир уонна экипаж икки чилиэнэ баара. Салгын суудуната Дьокуускайтан Дьааҥы улууһун Суордаах сэлиэнньэтигэр көтөн испит.
НВК САХА — Атырдьах ыйын 26 күнүгэр бэстилиэттээх сулууспатыттан барбыт тырааныспар полициятын үлэһитин ууратыахтара.
«Билигин бэрэбиэркэ үлэтэ барар. Ол түмүгүнэн дьыала иһин-таһын, төрүөтүн быһаарыахпыт. Полиция, биллэн турар, үлэтиттэн ууратыллыаҕа», – диэтилэр ИДьМ тырааныспарка линейнэй бырабылыанньатыгар.
Санатан эттэххэ, тырааныспар полициятын сержана Айтал Томскай толору ботуруоннаах Макаров бэстилиэтин ылан баран, үлэтигэр тиийбэтэх. Кинини көрдүүргэ биллэрбиттэрэ. Социальнай ситимҥэ бэйэтигэр тиийиммит диэн сымыйа сурах тарҕаммыта. Бэҕэһээ, атырдьах ыйын 29 күнүгэр, туппуттара.
НВК САХА — Атырдьах ыйын 28 күнүгэр сулууспатыттан бэстилиэттээх тахсан барбыт полиция үлэһитин туппуттар. Бу туһунан «Якутия 24» ханаал бэйэтин кырдьыктаах источнигар сигэнэн иһитиннэрэр.
Санатан эттэххэ, тырааныспар полициятын сержана Айтал Томскай толору ботуруоннаах Макаров бэстилиэтин ылан баран, үлэтигэр тиийбэтэх. Кинини көрдүүргэ биллэрбиттэрэ. Социальнай ситимҥэ бэйэтигэр тиийиммит диэн сымыйа сурах тарҕаммыта.
Билиҥҥи туругунан, ИДьМ тырааныспарка линейнэй бырабылыанньата официальнай комментарий биэрэ илик.
НВК САХА — «Тойота» массыына суоппара «КамАЗ» массыынаны ситэн ааһаары, уруулун туппакка, сыбаайалары тиэммит таһаҕас массыынатыгар баран түспүт. Бу туһунан Суолга куттал суох буолуутун судаарыстыбаннай инспекцията иһитиннэрдэ.
Суол быһылаана түүн үөһэ Бүлүү куораттан Сыдыбыл бөһүөлэккэ диэри «Бүлүү» федеральнай суол учаастагар таҕыста. 33 саастаах дьахтар «КамАЗ» массыынаны ситэн ааһаары, таһаҕас массыынатыгар кэтиллибит.
Суоппартан ураты, массыына инники олбоҕор 52 саастаах эр киһи айаннаан испит, массыына курун баанан олорбут. Элбэх эчэйиилээх уонна тостуулаах, оһолломмут дьону Бүлүү куорат балыыһатын хирургическай отделениетыгар киллэрбиттэр.
«КамАЗ» массыына суоппара этэринэн, массыына ситэн ааһан иһэрин туһунан кэнниттэн айаннаан испит массыына суоппара сэрэппит, ол эрээри суоппар түргэнэ бэрдиттэн тугу да гыммакка хаалбыт.
НВК САХА — «Якутия» авиахампаанньа Sukhoi Superjet-100 пассажирскай сөмөлүөтэ Дьокуускай — Певек хайысханан көтөн истэҕинэ, илин тааһа хайа барбыт. Бу туһунан Чукотка автономнай уокуругуттан иһитиннэрэллэр.
Быһылаан атырдьах ыйын 28 күнүгэр тахсыбыт.
«Сөмөлүөт сиргэ түһүүтэ сымнаҕастык ааспыт, биир да киһи эчэйбэтэх», — диэн эттилэр. Дьокуускай куоракка төннөр рейсин тохтоппуттар.
Певек куорат аэропордун генеральнай дириэктэрэ Сергей Батыченко иһитиннэрбитинэн, билиҥҥи туругунан сөмөлүөт аэропорт тохтобулугар турар, «Якутия» авиахампаанньа техническэй исписэлиистэрэ тиийэллэрэ күүтүллэр.
Источник: сайт телеканала «Якутия 24».
