НВК Саха

НВК САХА — Анаабыр оройуонун Сааскылаах бөһүөлэгин биэнсийэ отделениетыттан 466 тыһыынча солкуобайы уоруллубут. Ол курдук сымыйа докумуоннарынан чааһынай биэнсийэ пуондатыгар ыытыллыбыт. Бу туһунан өрөспүүбүлүкэ борокуратууратын пресс-сулууспата иһитиннэрэр.

«2017-2018 сылларга биллибэт киһи Анаабыр улууһун Сааскылааҕын олохтоохторун ааттарыттан сымыйа докумуоннары биэрэн, биэнсийэ мунньунуллар чааһын чааһынай биэнсийэ пуондатыгар ыытарбыт. Уоруллубут суума уопсайа 466 тыһыынча солкуобайга тэҥнэһэр», — диэн этиллэр.

Холуобунай дьыала тэрилиннэ. Силиэстийэ оройуон борокуратууратын тус хонтуруолугар сылдьар.

 Подробнее

НВК САХА — Балаҕан ыйын 6 күнүнээҕи туругунан өрөспүүбүлүкэҕэ түөрт баһаары умуруорар үлэ барар. Олортон иккитэ — Дьааҥы уонна Мэҥэ Хаҥалас улуустарыгар. Бу туһунан СӨ Экологияҕа министиэристибэтэ иһитиннэрэр.

«Абый уонна Эбээн Бытантай улуустарыгар икки ойуур баһаарын тарҕаныытын тохтоттулар. Ойуур баһаарын уота ылан ааспыт сирин уопсай иэнэ 407,0 гаҕа тэҥнэстэ. Бүтэһик сууккаҕа өрөспүүбүлүкэ хонтуруолланар сиригэр алта ойуур баһаарын умуруордулар», — диэн этиллэр.

Ойуур баһаарын умуруорууга барыта 60 киһи уонна 4 тиэхиньикэ үлэлиир.

 Подробнее

НВК САХА — Алдан куоратыгар  «Toyota — Crown» массына суоппара суолу сөбө суох сиринэн туораан испит 15 саастаах оскуола оҕотун түҥнэри көппүт. Бу туһунан Суолга куттал суох буолуутун судаарыстыбаннай инспекцията иһитиннэрдэ.

Саахал түмүгэр оскуола оҕото төбөтүн эчэппит, хас да сиринэн уҥуоҕа тостубут уонна дьүккү барбыт. Суһал көмө биригээдэтэ кинини Алдан куорат балыыһатыгар киллэрбит.

Суоппар бүтэһик сыл устата суол быраабылатын кэһиигэ эппиэтинэскэ тардыллыбатах, массыына ыытыы кэмигэр өйдөөх эбит.

Кыыс кэпсииринэн, ыксаан иһэр буолан суолу быһа туоруурга санаммыт.

«Саахал тахсыбыт сирэ көнө, асфальт бүрүөһүннээх. Сөҥүүтэ суох, сырдык кэм эбит», – диэн тириэрдэллэр. Саахал түмүгүнэн бэрэбиэркэ ыытыллар.

 Подробнее

НВК САХА — Уус Алдан улууһун Бороҕон сэлиэнньэтин олохтооҕун 13 сылга көҥүлүн быһар туһунан уураах таһаардылар. Бу туһунан борокуратуура пресс-сулууспата иһитиннэрэр.

«2018 сыл сэтинньи ыйын 29 күнүгэр дьүүллэнээччи итирик туруктаах Бороҕон сэлиэнньэтин Лонгинов аатыннан уулуссатыгар элбэх кыбартыыралаах дьиэ иһигэр уһун уостаах саанан ытыалаабыт. Кыбартыыра ис үрдүн, истиэнэтин уонна киирэр аанын, ону таһынан аан нөҥүө уопсай көрүдүөр истиэнэтин 44-тэн тахсата ытыалаабыт», — диэн тириэрдэллэр.

Ону таһынан, суһал ыҥырыынан быһылаан буолбут сиригэр кэлбит полиция үлэһитин аан нөҥүө 20-тэн тахсата ыппыт. Атын дьон баайын соруйан буортулааһын уонна сокуон бэрэстэбиитэлин өлөрө сатыыбытын иһин эппиэтинэскэ тардылынна.

Үрдүкү суут присяжнайдарын бөлөҕө буруйдааҕы 13 сылга кытаанах режимнаах колонияҕа хаайарга уураах таһаарда. Уураах олоххо киирэ илик уонна хоһуттан көрүүгэ ыытыллыан сөп.

 Подробнее

НВК САХА — Биллибэт суоппар атырдьах ыйын 31 күнүгэр Космонавтар уонна Окружной суоллар быһа охсуһууларыгар 15 саастаах кыыһы түҥнэри көтөн баран, саахал тахсыбыт сириттэн куоппут. Бу туһунан суолга куттал суох буолуутун судаарыстыбаннай инспекциятын пресс-сулууспата иһитиннэрдэ.

«Атырдьах ыйын 31 күнүгэр олохтоох бириэмэнэн 19.55 чааска, биллибэт суоппар Космонавтов уонна Окружной суоллар быһа охсуһууларыгар баар хонтуруолламмат суол туорааһыныгар сокуоннай сааһын ситэ илик 15 саастаах кыыһы түҥнэри көтөн баран, суол быраабылатын кэһэн туран саахал тахсыбыт сирин хаалларан барбыт», — диэн этиллэр.

Судаарыстыбаннай инспекция саахал тахсыытын туоһу дьонун дьуһуурунай чааска 127 нүөмэринэн эрийэллэрин көрдөһөр.

 Подробнее

НВК САХА — Алдан улууһун урбаанньыта албыннатан уонна итэҕэтэн 795 тыһыынча солкуобай харчыны уордарбытын туһунан полицияҕа сайабылыанньа суруйбут. Бу туһунан өрөспүүбүлүкэ ИДьМ пресс-сулууспата иһитиннэрэр.

Хас да сыл анараа өттүгэр, урбаанньыт Алдан нөҥүө айаннаан ааһан испит дьахтары кытары билсибит. Сотору соҕус буолан баран дьахтар киниэхэ интернет ситимин нөҥүө суруйбут, хардары суруйсан киирэн барбыттар. Интернет ситимин нөҥүө суруйсуу кэмигэр урбаанньыт ол дьахтар көрдөһүүтүнэн киһини көмүүгэ, ийэтин эмтэниитигэр уонна да атын кыһалҕаларыгар хаста да харчы ыыппыт. Тиһэҕэр кэлэн саарбаҕалаан бэйэтигэр эрийэргэ санаммыт, онто дьахтар бу туһунан тугу да билбэт буолан биэрбит.

Кэлин биллибитэ албыннааһыҥҥа урбаанньыт биир маҕаһыыныгар атыыһытынан үлэлээбит дьахтар сыһыаннааҕа биллибит. 25 саастаах уорбаланааччы дьахтар урбаанньыт Алдан нөҥүө айаннаан ааһан испит дьахтары кытары билсибитин билбит уонна интернет социальнай ситимигэр сымыйа сирэй оҥорон суруйсан саҕалаабыт. Урбаанньыттан ылбыт харчытын таҥаска-сапка бараабыт. «Түөкүннээһин» ыстатыйанан холуобунай дьыала тэрилиннэ. Уорбаланааччы 6 сылга диэри көҥүлэ быһыллыан сөп.

 Подробнее