Киин куорат бүтүн россиятааҕы куонкурус бастакы түһүмэҕин ситиһиилээхтик ааһан, «Молодёжная столица России – 2027» диэн үрдүк аакка уон иһигэр киирдэ.
Дьокуускайы кытта иккис түһүмэххэ Архангельскай, Улуу Новгород, Иваново, Краснодар, Мурманскай, Нальчик, Сыктывкар, Уфа уонна Ярославль куораттар аастылар.
Билигин номинаннар иннилэригэр саҥа, уустук сорук турар. Сэтинньи 10 күнүгэр диэри куораттар «Сайаапка кинигэтин» — Дьокуускай ис хоһоонноох уонна иһитиннэрэр-биллэрэр каартатын быһыытынан буолуохтаах дьоһун докумуону бэлэмниэхтээхтэр. Онно куорат сүрүн кыахтарын көрдөрүөхтээхтэр: устудьуон инфраструктуратын сайдыытын, айар эйгэ тиийимтиэтин, ыччат көҕүлээһиннэрин ахсаанын уонна хаачыстыбатын, ону тэҥэ ирбэт тоҥ усулуобуйатыгар үгэстэри харыстааһыҥҥа олоҕурбут ураты култуураны.
Дьүүллүүр сүбэ аҥаардас тиэкис ис хоһоонун эрэ буолбакка, хас биирдии кыттыылаах медийнэй стратегиятын эмиэ сыаналыаҕа. Сэтинньи 10 күнүнээҕи сыанабыл түмүгүнэн, биэс куорат финалга тахсыаҕа.
Куонкурус кыайыылааҕар 2027 сыл устата ыччат киинин аатын сүгэр быраап бэриллиэҕэ. Бу федеральнай өйөбүлгэ, киэҥ далааһыннаах грант бырагыраамаларыгар, бэйэтин сиригэр-уотугар улахан ыччат форумнарын ыытыыга, ону тэҥэ дойду үрдүнэн эдэр исписэлиистэр уонна туристар кэлиилэригэр улахан кыаҕы арыйыаҕа. Дьокуускайга бу федеральнай таһымҥа бэйэтин туһунан биллэрии эрэ буолбакка, куорат эйгэтин сайыннарыыга уонна олохтоох талааннары өйөөһүҥҥэ саҥа ресурсалары тардарга кыах биэрэр.
Хаартыска: Дьокуускай куорат дьаһалтатын пресс-сулууспата
