Алтынньы 13 күнүгэр Ленин проспегар турар 1-кы нүөмэрдээх оскуола саҥа дьиэтигэр Дьокуускай куорат дьаһалтатын бэрэстэбиитэллэрэ куорат төрөппүттэрин сэбиэтин чилиэннэрин кытта көрүстүлэр. Мээр солбуйааччыта Ольга Яшина, үөрэх управлениетын салайааччыта Андрей Новоприезжай уонна үөрэх управлениетын салайааччытын солбуйааччыта Айан Иванов балаһыанньаны кэпсээтилэр уонна көрүүнү-истиини ыыттылар диэн «Эхо столицы» иһитиннэрэр.
Оскуола Дьокуускай куорат маастар-былаанын чэрчитинэн тутуллубут. Тутуу 2024 сылтан саҕаланан, 2026 сылга түмүктэммит. Атырдьах ыйын 26 күнүгэр Саха сиринээҕи УГСЖН (Управления государственного строительного и жилищного надзора) эбийиэк бырайыакка эппиэттиирин туһунан түмүк таһаарбыт. Ол төрүккэ олоҕуран, дьиэни үлэҕэ киллэрбиттэр. Атырдьах ыйын 27 күнүгэр киин куорат дьаһалтата уонна Судаарыстыбаннай сакаас сулууспата быстах кэмҥэ көрүү-истии дуогабарын түһэрсибиттэр — оскуола куорат балаансатыгар киирбит.
Балаҕан ыйын 9 күнүгэр Гигиена уонна эпидемиология киинэ санитарнай ирдэбиллэргэ эппиэттээбэт, 15 итэҕэстээх диэн түмүк биэрбит. Ааспыт нэдиэлэҕэ бэрэбиэркэни борокуратуура эмиэ ыыппыт. Онно эмиэ ити итэҕэстэри ыйбыттар уонна сылааһы холбооботохторун эбэн эппиттэр.
Бүгүҥҥү күҥҥэ 15 итэҕэстэн 14-дэ туоратыллыбыт.
Туоратыллыбатах сүрүн итэҕэстэр: — юридическай сирэйи кытта быстах кэмҥэ көрүү-истии дуогабарыгар илии баттана илик (ону оскуола дириэктэрэ илии баттыахтаах); — күрүө суох. Бырайыагар киин куорат көстүүтүн алдьаппат туһуттан көрүллүбэтэх. Ол эрээри мэрия төрөппүттэргэ үлэлиир бөлөҕү тэринэн, көрүҥү алдьаппат уонна куттала суох күрүө моделин оҥорорго этии киллэрбит. Онно 14 мөлүйүөн кэриҥэ солкуобай көрүллүбүт. Дьокуускай баһылыга Дмитрий Садовников Роспотребнадзорга гарантийнай сурукка илии баттаабыт — итэҕэһи 2027 сыл атырдьах ыйын 30 күнүгэр диэри туоратарга.
Маны таһынан уолаттар мастарыскыайдарыгар салгын таһаарар турбата (вытяжка) уонна куукунаҕа сэттэ оннугар биэс эрэ сууйар раковина турар. Бу итэҕэстэри куорат мээрин суругунан эмиэ мэктиэлээбиттэр.
Тугу көннөрдүлэр?
Писсуардар икки ардыларыгар быыстар турбуттар. Информатика кэбиниэтин көмпүүтэрдэрэ билигин сабыллан турар сиргэ хараллаллар — үөрэх саҕаланыан иннинэ туруоруохтара, сэртипикээттэрэ бааллар. Спорт былаһааккатын бүрүөһүнүгэр, тутуу матырыйаалларыгар, миэбэлгэ уонна мастарыскыайга докумуоннар бааллар. Кэбиниэттэр ыйынньыктара сөпкө турбуттар, душевой иэнэ — 12,28 кв.м. Сылааһы алтынньы 9 күнүгэр биэрбиттэр.
Роспотребнадзор хат бэрэбиэркэни ыытарыгар анаан быстах кэмҥэ көрүү-истии дуогабарыгар илии баттанара күүтэллэр. Иккис чиэппэр саҕаланыытыгар оскуола үөрэнээччилэри көрсөр кыахтаныаҕа диэн сабаҕалыыллар.
