Саха сирин IX норуоттар икки ардыларынааҕы киинэ бэстибээлин үөрэҕин бырагыраамата бары баҕалаахтарга аһаҕас буолуоҕа. Бу туһунан ТАСС-ка пресс-кэмпириэнсийэҕэ Саха сирин кинематографистарын ассоциациятын салайааччыта, үөрэх блогун сүрүннүүр режиссер Степан Бурнашев иһитиннэрдэ. Кини этэринэн, тэрээһиннэргэ хас да дойдуттан эспиэрдэр кыттыахтара, оттон болҕомто ордук продюсердааһын боппуруостарыгар ууруллуоҕа.
«Биһиги олус интэриэһи тардар ыалдьыттары — Россияттан, Японияттан, Кытайтан, Кыргызстантан исписэлиистэри ыҥырдыбыт. Продюсердааһын диэн тугуй, кини хайдах үлэлиирин: ааптар саҕалааһынын курдук дуу, эбэтэр олоччу продюсер функциятын эрэ курдук дуу диэн ырытыахпыт. Ону тэҥэ регионнааҕы киинэ таһыгар хайдах тахсар туһунан эмиэ кэпсэтиэхпит», — диэн Бурнашев эттэ.
Режиссер этэринэн, тэрээһиннэр форматтара табыгастаах буолуохтара. «Биһиги тэрээһиннэрбит аһаҕас буолуохтара. Баҕалаах барыта кэлэн истиэн, уопут атастаһыан, ыйытыы биэриэн сөп», — диэн кини бэлиэтээтэ.
Бурнашев бэстибээл үөрэҕин чааһа ыга тиһиллибитин — көрүү бастакы күнүттэн бүтэһик күнүгэр диэри ыытылларын бэлиэтээтэ. «Биһиги үөрэхпит чааһа эдэр кинематографистар билиилэрин-көрүүлэрин өссө хаҥаталларыгар, үрдүк ситиһиилэргэ дьулуһалларыгар көмөлөһүө диэн эрэнэбин», — диэн эптэ.
Саха сирин IX норуоттар икки ардыларынааҕы киинэ бэстибээлэ РФ Култуураҕа министиэристибэтин өйөбүлүнэн сэтинньи 4 күнүттэн 9 күнүгэр диэри Дьокуускайга ыытыллыаҕа. Үгэс быһыытынан, кини Россияттан уонна аан дойду атын дойдуларыттан ааптардар, көрөөччүлэр уонна киинэ идэлээхтэрин көрсөр сиринэн, култууранан атастаһар, идэлээхтэр кэпсэтэр уонна саҥа ааттары арыйар былаһаакканан буолуоҕа.
Хаартыска: Сахафильм
