Биллиилээх судаарыстыбаннай, уопсастыбаннай диэйэтэл, Саха сирин бастакы бэрэсидьиэнэ Михаил Николаев соратнига, өрөспүүбүлүкэҕэ үөрэх сайдыытыгар уонна каадырдары бэлэмнээһиҥҥэ элбэх сыратын уурбут Матвей Мучин 86 сааһыгар олохтон туораата.
Ил Дархан Айсен Николаев Матвей Мучин олохтон туораабытынан кутурҕанын биллэрдэ:
«2021 сылга Матвей Васильевичка «Полярная звезда» уордьаны туттарбытым. Онно кини этиитигэр салайбыт департаменын үлэтин көмөтүнэн тыһыынчанан устудьуон Россия, тас дойду үөрэх кыһаларыгар үөрэнэр кыахтаммыттарын бэлиэтээбитэ. Матвей Васильевич ааттаах педагог быһыытынан билии күүһүгэр, оҕолор талааннарыгар күүскэ итэҕэйэр буолан кинилэр инники суолларын тобулалларыгар көмө бөҕөтүн оҥорбута. Миэхэ кини олоҕун суола – дьоҥҥо кыһамньылаах буолуу уонна төрөөбүт өрөспүүбүлүкэтин инникитигэр эппиэтинэстээх буолуу үтүө холобура. Матвей Васильевич кэргэнигэр, оҕолоругар, сиэннэригэр, аймахтарыгар, чугас дьонугар дириҥ кутурҕаммын биллэрэбин».
