«Тыа сирин комплекснай сайдыыта» бырагырааманан өрөспүүбүлүкэ сэлиэнньэлэрин тупсаран оҥорууга 1,3 миллиард солкуобайтан тахса суума федеральнай бүддьүөттэн көрүллүбүт.
Бу туһунан өрөспүүбүлүкэ бырабыыталыстыбатын бэрэссэдээтэлин солбуйааччы Михаил Никифоров былаастар сыллаҕы отчуоттарыгар иһитиннэрдэ.
«Бу бырагыраамаҕа федеральнай бүддьүөттэн эрэ 1,3 миллиард солкуобай көрүллүбүтэ. Манна олорор дьиэлэри, социальнай эбийиэктэри уонна кварталлары комплекснай тутуу ыытыллар. Бүгүҥҥү туругунан, Өлөөн улууһун Дьилиндэ бөһүөлэгэр оҕо уһуйаана тутулунна. Сотору кэминэн аһыллара былааннанар», — диэтэ кини.
Маны таһынан, бу үп анал тиэхиньикэни атыылаһарга, уу ыраастыыр ыстаансыйа, уу уонна гаас ситимнэрин тардыытыгар учуоттаналларын бэрэссэдээтэли солбуйааччы чопчулаан эттэ.
«Бырагыраамаҕа уопсайа 98 муниципальнай тэриллии кытынна, кинилэр 93 бырайыактара РФ тыатын хаһаайыстыбатын министиэристибэтин көрүүтүгэр талыллыбыта, түмүгэр уон бырайыак олоххо киирэн саҕалаата. Кинилэр 2022 сылга түмүктэниэхтэрэ», — диэн Михаил Никифоров бэлиэтээтэ.
