Аҕыс ойуур баһаара умуруорулунна

Саха сиригэр ааспыт сууккаҕа 33 тыһ. га иэннээх аҕыс ойуур баһаарын умуруордулар.

Бу туһунан экология, айылҕаны туһаныы уонна ойуур хаһаайыстыбатын миниистирин солбуйааччы Андрей Коноплев брифиҥҥэ иһитиннэрдэ.

Алдаҥҥа, Аммаҕа, Кэбээйигэ, Мииринэйгэ, Өлүөхүмэҕэ, Сунтаарга, Уус Маайаҕа ойуур баһаардарын умуруордулар.

Ааспыт сууккаҕа салгын аалын уонна космостан кэтээн көрүү түмүгүнэн, 2 тыһ. га иэннээх 11 ойуур уотун буллулар.

От ыйын 15 күнүн сарсыардааҥҥы түмүгүнэн Саха сиригэр 159 ойуур баһаара уонна икки ландшафтнай уот умайаллар. 42 тыһ. га иэннээх түөрт баһаары төгүрүйдүлэр.

Баһаары умуруорууга уопсайа 1827 киһи уонна 143 тиэхиньикэ үлэлиир. Көтөр ааллар үлэлииллэр. Як-40 зондировщик-сөмөлүөт Саха сирин илин өттүгэр уонна Алдан оройуонугар үлэлиир. «Авиалесоохрана» тэрилтэ зондировщик-сөмөлүөт өрөспүүбүлүкэҕэ кэлэрэ күүтүллэр.