2019 сылга Саха сиригэр «Куттала суох уонна хаачыстыбаллаах суоллар» национальнай бырагыраама чэрчитинэн былааннаммыт үлэ 92 %-на туолла. Бу туһунан СӨ тырааныспар уонна суол хаһаайыстыбатын министиэристибэтин пресс-сулууспата иһитиннэрэр.
2019 сылга национальнай бырайыакка киирбит өрөспүүбүлүкэ 22 эбийиэгиттэн: 19-гар үлэ түмүктэннэ, олортон 18 эбийиэк толору үлэҕэ киирдэ, үһэ 2020 сылга түмүктүүргэ көһөрүлүннэ .
Ахсынньыга «Яна» айан суолугар 10 килэмиэтир уһуннаах кэрчиги бүтэрэн туттарыахтара, оччотугар быйылгы үлэ кэриҥэ барыта түмүктэниэ.
«Дьокуускай куорат иһинээҥҥи суоллары оҥорууга болдьохтон хаалыы баар. Бүгүҥҥү туругунан 19 эбийиэктэн биирэ да туттарылла илик», — диэн СӨ тырааныспар министиэристибэтэ иһитиннэрэр.
Намыһах температура үлэ ыытылла турар эбийиэктэригэр дьайбат. Асфальт бүрүһүөнүн ууруу үлэлэрэ түмүктэнэн тураллар диэн бэлиэтэнэр.
«Болдьохтон хаалыы төрүөтүнэн үгүс өттүгэр, үлэни тутар хамыыһыйа бытархай итэҕэстэри булуута буолла. Суолу сатыы туоруур балаһалар, тротуардар, уулуссаны сырдатыы курдук хабааннаах үлэлэр ситтэхтэринэ, ахсынньыга бары эбийиэктэр бэлэм буолуохтара», — диэн этиллэр.
Маны таһынан «Севернай» уонна «Марха» микрорайоннарыгар икки муоста тутуута түмүктэнэ илик. Билиҥҥи туругунан сүрүн конструкциялар тиэрдиллэн, монтаж үлэтэ бара турар. «Севернай» микрорайон суолун оҥоһуута эмиэ бүтэн эрэр.
Дьокуускай уулуссаларын оҥоһуллубут суоллар хаачыстыбаларын бэрэбиэркэлиир тэрээһин ыытылла турарын туһунан министиэристибэ бэлиэтиир. Бэрэбиэркэ түмүгүнэн эбийиэктэр үлэҕэ киирэр болдьохторун быһаарыахтара.
