2020 сылга Алдан улууһугар хаарбах туруктаах дьиэттэн көһөрүү бырагыраама чэрчитинэн 344 дьиэ кэргэн саҥа кыбартыыра ылыаҕа. Бу туһанан СӨ баһылыгын уонна бырабыыталыстыбатын пресс-сулууспата иһитиннэрдэ.
Өрөспүүбүлүкэ бырабыыталыстыбатын үлэтин отчуоттуур бөлөҕө Алдан улууһугар үлэлиир. Бырабыыталыстыба бэрэссэдээтэлин солбуйааччы Кирилл Бычков баһылыктаах делегацията Алдан уонна Томмот куораттарыгар хаарбах дьиэттэн көһөрүү бырагырааматынан тутулла турар элбэх кыбартыыралаах дьиэлэри көрдүлэр. 2020 сылга 344 дьиэ кэргэҥҥэ анаан икки куоратынан сэттэ дьиэ тутуллуохтааҕа күүтүллэр.
«2020 сылга Томмот куоратыгар үс дьиэ үлэҕэ киирдэҕинэ 95 дьиэ кэргэн олорор усулуобуйалара тупсуоҕа. СӨ тутуу министиэристибэтэ уонна улуус дьаһалтата икки саҥа тутуллубут дьиэ бу саас, онтон биирэ — сайын үлэҕэ киирэрин туһунан былаанныыллар», — диэн Кирилл Бычков эттэ.
Алдаҥҥа хаарбах туруктаах дьиэлэртэн көһөрүү бырагырааматынан 249 кыбартыыралаах түөрт дьиэ тутулла турара бэлиэтэнэр. Дьиэлэр 2020 сыл балаҕан ыйын 1 күнүгэр үлэҕэ киирэллэрин туһунан СӨ тутуу министиэристибэтэ былаанныыр.
