2020 сылга дойду үрдүнэн биллэриллибит Өйдөбүнньүк уонна Албан аат сылын чэрчитинэн Саха сиригэр 190-тан тахса Аҕа дойду Улуу сэриитин пааматынньыгын өрөмүөннүөхтэрэ. Бу туһунан ТАСС иһитиннэрэр.
«2019 сыл ахсынньытыгар «Кыайыы» өрөспүүбүлүкэтээҕи тэрийэр кэмитиэт ыыппыт сүбэ мунньаҕын боротокуолунан, Улуу Кыайыы 75 сылын көрсө Саха сирин улуустарын уонна куорат уокуруктарын баһылыктара Аҕа дойду Улуу сэриитигэр ананар пааматынньыктары, монуменнары уонна обелисктары өрөмүөннээһин, чөлүгэр түһэрии уонна сөргүтүү үлэтин ыытыахтаахтар. 2020 сылга муниципальнай тэриллиилэр 194 пааматынньыгы өрөмүөннүүрү былаанныыллар», — диэн өрөспүүбүлүкэтээҕи култуурнай нэһилиэстибэ эбийиэктэрин харыстааһын департаменын салайааччыта Николай Макаров кэпсээтэ.
Сорох оройуоннарга уонна нэһилиэнньэлээх пууннарга изоляция эрэһиимэ биллэриллэн, муус устар 25 күнүгэр диэри түмүктэниэхтээх үлэ болдьоҕо көһүөн сөптөөҕүн биэдэмистибэ учуоттуур. Үлэ былаана уонна эрэһиимэ өрөспүүкэҕэ олохтоммут балаһыанньаны учуоттаан тэриллиэҕэ.
Билиҥҥи туругунан өрөспүүбүлүкэҕэ Аҕа дойду Улуу сэриитин кыттыылаахтарыгар, саха чулуу буойуттарыгар ананар 210 пааматынньык ааҕыллар.
Саха сирин бары кэриҥэ улуустарыгар баар пааматынньыктар Россия култуурнай нэһилиэстибэтин биир кэлим тиһигэр киирэллэр. Маны таһынан сэттэ саҥа тутулунна.
Николай Макаров бэлиэтииринэн, өрөспүүбүлүкэҕэ 15 паматынньык маннык тиһиккэ киирбэт. Олортон 12-тин быйыл тупсаран оҥоруохтара.
Аҕа дойдубут чулуу буойуттар ааттарын уонна хорсун быһыыларын үйэтитии история чахчытын харыстааһын буоларын учуоттаан Россия бэрэсидьиэнэ Владимир Путин 2020 сылы дойду үрдүнэн Өйдөбүнньүк уонна Албан аат сылынан биллэрбитэ.
