2021 сылга Дьокуускайдааҕы орто-анал үөрэх тэрилтэлэрин, ону тэҥэ музыка үрдүкү оскуолатын 176 киһи бүтэрэр. Бу туһунан СӨ култууратын уонна духуобунай сайдыытын министиэристибэтин пресс-сулууспата иһитиннэрэр.
«Бүгүн биһиги дойдубут бэрэсидьиэнин, өрөспүүбүлүкэ салалтатын таһымыгар култуура эйгэтигэр профессиональнай үөрэхтээһиҥҥэ үрдүк болҕомто ууруллар. Быйыл үөрэх тэрилтэлэрин номнуо биллэр-көстөр, олус талааннаах оҕолор түмүктээн эрэллэр», — диэн СӨ култууратын уонна духуобунай сайдыытын миниистирин солбуйааччыта Марина Силина бэлиэтээтэ.
Бу күннэргэ судаарыстыбаннай түмүк аттестация ыытыллар. Эксээмэн очнай уонна дистанционнай көрүҥүнэн буолуоҕа.
Ол курдук, Аграфена Макарова аатынан култуура уонна искусство колледжыгар бэс ыйын 8-21 күннэригэр очнай-дистанционнай көрүҥүнэн, Марк Жирков аатынан музыкальнай колледжка бэс ыйын 1-14 күннэригэр дистанционнай көрүҥүнэн ыытыллыаҕа.
Василий Босиков аатынан музыка үрдүкү оскуолатыгар аттестация бэс ыйын 3-10 күннэригэр дистанционно, Петр Романов аатынан художественнай училищеҕа — ыам ыйын 27-тэн бэс ыйын 23 күнүгэр диэри.
Судаарыстыбаннай түмүк аттестация кэнниттэн үөрэххэ докумуону тутуу хампаанньата үлэтин саҕалыаҕа.
